Հրազենային վնասվածք ստացած ծննդկանն արդեն կարողանում է ինքնուրույն շնչել. Փոքրիկի վիճակը եւս ծանր է

Ամուսնու կողմից  ծանր հրազենային վնասվածք ստացած ծննդկանի վիճակը դեպի լավն է գնում: Այս մասին NEWS.am-ի թղթակցի հետ զրույցում ասաց Երեւանի Պերինատոլոգիայի, մանկաբարձության եւ գինեկոլոգիայի կենտրոնի ղեկավար Ռազմիկ Աբրահամյանը:

Նա նշեց, որ վիճակի վատացում չկա, կայուն ծանր է, կինը դեռ գտնվում է Վերակենդանացման բաժանմունքում, արհեստական շնչառության ապարատը փորձնական հանել են, կարողանում է ինքնուրույն շնչել: Կայուն ծանր է նաեւ նորածնի վիճակը, բժիշկը նշեց, որ նրանց հսկողություն ու բուժում է պետք: Որեւէ վիրահատության անհրաժեշտություն չկա, իսկ միջադեպը կնոջ եւ բալիկի հետագա կյանքի վրա որեւէ հետեւանք  չի թողնի:

Ավելի վաղ NEWS.am-ը հայտնել էր, որ Երեւանի Պերինատոլոգիայի, մանկաբարձության եւ գինեկոլոգիայի կենտրոնում հունիսի 30-ին արտակարգ դեպք է գրանցվել: Ամուսինը եկել էր հիվանդանոց, կրակել ժամեր առաջ կեսարյան հատմամբ ծննդաբերած կնոջը, ապա ինքնասպան եղել:

Մեզ հաջողվեց պարզել, որ նրանք ապրում են Դավիթաշենում, կինը՝ 27-ամյա Միլենա Ա.-ն ծննդաբերել է 8 ամսականում: Ամուսինը՝ 33-ամյա Հայկ Վ.-ն գալով հիվանդանոց տեսել էր զոքանչին եւ հարազատներին այնտեղ, ապա նրանց ուղարկել էր բուլկի գնելու եւ կրակել կնոջ պարանոցին: Ամուսինը տեղում մահացել էր, կնոջը վիրահատել են, վիճակը ծայրահեղ ծանր է, լույս աշխարհ եկած բալիկը լավ է: