Ապահով Հայաստանը ՀՀԿ-ում կայացած փաստ է. դուք ապրեցիք, իսկ ժողովո՞ւրդը (լուսանկարներ)

ՀՀԿ ղեկավար Սերժ Սարգսյանը կուսակցության համագումարներից մեկում ասել էր, թե հաջողվեց Հայաստանը դուրս բերել ֆինանսատնտեսական ճգնաժամից: Ստորև ներկայացրած լուսանկարներն արվել են Հանրապետական կուսակցության միջոցառումներից մեկի ժամանակ:

Սրանք ՀՀԿ-ի միջին խավի ավտոմեքենաներն են: «Բոլորս նույն կառույցի մասերն ենք. ինչպես տաճարի հիմքը, սյուներն ու գմբեթը ունեն տարբեր գործառույթներ, բայց բոլորը միասին մեկ ամբողջություն են»,- մի առիթով հայտարարեց Սերժ Սարգսյանը:

Դժվար չէ դատել, թե ինչի դիմաց ինչ գործառույթ են որդեգրել այդ տաճարի «սյուները»՝ արդեն պատմություն դարձած տարբեր ընտրություններում գմբեթի հաղթանակը ապահովելով: Եվ ոչ պակաս կարեւոր է վերլուծել, թե ինչ հնարավորություններ է բացվում դա նրանց համար՝ իրենց ծառայությունների դիմաց: Ձեռքի տակ ունենալով ժողովրդի փողը տնօրինելու հնարավորություն եւ համապատասխան թողտվություն, ամեն վարչության ու բաժնի, ԺԷԿ-ի եւ կոմունալի պետ, ծառայություն մատուցելով տերերին, փոխարենն իր բաժինն է ստանում: Այսպիսով, կարող ենք արձանագրել, որ, ի տարբերություն Հայաստանի Հանրապետության եւ Հայաստանի ժողովրդի, Հանրապետական կոչվող «կղզյակը» բարեկեցության մէջ է՝ երկրից ու ժողովրդից անկախ: Եվ կարելի է նշել, որ 2013թ. իր նախընտրական խոստումներից մեկը՝ յուրաքանչյուր ընտանիք պետք է զգա պետության հոգածությունը, որ պարտավորվել է կատարել մինչեւ 2018-ը, գոնե Հանրապետական կուսակցության նվիրյալ ընտանիքների մասով Սերժ Սարգսյանը կատարել է ժամկետից շուտ:

 

Գագիկ Աղբալյան