ՀԾՖ նախագահի միակ թեկնածուն Արայիկ Հարությունյանն է

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Հայաստանի ծանրամարտի ֆեդերացիայի նախագահի միայն մեկ թեկնածու կա եւ նա Արայիկ Հարությունյանն է:

Այս մասին NEWS.am Sport-ի թղթակցի հետ զրույցում հայտնեց ծանրամարտի տղամարդկանց Հայաստանի հավաքականի գլխավոր մարզիչ, Հայաստանի ծանրամարտի ֆեդերացիայի գլխավոր քարտուղար Փաշիկ Ալավերդյանը:

Հունվարի 22-ին Մատենադարանում տեղի է ունենալու ֆեդերացիայի նախագահի ընտրությունները:

«ՀԾՖ նախագահի ընտրություններում լինելու է միայն մեկ թեկնածու: Նա ՀՀ վարչապետի աշխատակազմի ղեկավար Արայիկ Հարությունյանն է»,- ասաց Փաշիկ Ալավերդյանը:

Հիշեցնենք, որ օրերս ֆեդերացիայի նախագահ, ՀԱՕԿ գլխավոր քարտուղար Հրաչյա Ռոստոմյանը ֆեյսբուքյան գրառումով հայտարարել էր, որ չի առաջադրվելու ՀԾՖ նախագահի պաշտոնում:

ՀԱՕԿ գլխավոր քարտուղար Հրաչյա Ռոստոմյանը ֆեդերացիան ղեկավարում էր 2016 թվականից։ Տարբեր մրցաշարերի ընթացքում Հրաչյա Ռոստոմյանը մի քանի անգամ խուսափել է ներկայանալ որպես ՀԾՖ նախագահ:

NEWS.am Sport-ին տված հարցազրույցներում մի քանի անգամ նշել է, որ իրեն ներկայացնել որպես ֆեդերացիայի աշխատանքները ղեկավարող, այլ ոչ նախագահ:

Թե ինչու է Հրաչյա Ռոստոմյանը որոշել այեւս չառաջադրվել, իր ֆեյսբուքյան գրառման մեջ ՀԱՕԿ գլխավոր քարտուղարը չի մանրամասնում, միայն նշում է, որ ժամանակն է նոր դեմքերի՝  նոր ծրագրերով:

Իրավունք ունե՞ր Հրաչյա Ռոստոմյանը ՀԱՕԿ գլխավոր քարտուղարի պաշտոնին զուգահեռ ղեկավարեկ նաեւ Հայաստանի ծանրամարտի ֆեդերացիան:

Արայիկ Հարությունյանը Հայաստանի ծանրամարտի ֆեդերացիայում «ակտիվ» գործունեություն է ծավալում դեռ 2023 թվականից, երբ Երեւանում անցկացվեց ծանրամարտի Եվրոպայի առաջնությունը:

2024 թ. մարտի 29-ին առաջինը Արայիկ Հարությունյանը հայտարարեց, որ 2027 թ. աշխարհի առաջնությունն անցկացվելու է Երեւանում: Նա գրառում էր կատարել ֆեյսբուքյան էջում:

«Ծանրամարտի միջազգային ֆեդերացիան որոշում ընդունեց 2027 թվականի աշխարհի առաջնության անցկացման իրավունքը տալ Հայաստանին:

Քիչ առաջ ներկայացրի մեր հայտը, որը համարվեց լավագույնը և անխոս առաջատարը: Սա աշխարհի առաջին առաջնությունն է օլիմպիական մարզաձևից, որը կանցկացվի Հայաստանում»,- գրել էր նա:

Այդ ժամանակ ֆեդերացիայի նախագահ Հրաչյա Ռոստոմյանը որեւէ հրապարակումով հանդես չեկավ:

ՀԾՖ նոր նախագահի ընտրությունները կանցկացվեն Մատենադարանի նիստերի դահլիճում հունվարի 22-ին, 12:00-ին:

Լուսինե Շահբազյան

Լուսանկարը՝ facebook.com/arayik.harutyunyan

 Հետևեք մեզ՝ այստեղ