Որքանո՞վ է բարձր Հայաստանում «թռչնագրիպի» տարածման ռիսկը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Այսօր հայտնի դարձավ, որ Ամերիկայի Միացյալ Նահանգներում «թռչնագրիպի» H5N1 տիպից առաջին մահն է գրանցվել։ Դեպքը արձանագրվել է Լուիզիանա նահանգում։ Մահացածը 65 տարեկանից բարձր տարիքի է եղել, նախկինում նրա մոտ ուղեկցող հիվանդություններ են ախտորոշվել։ Վարակումը տեղի է ունեցել ինչպես ընտանի, այնպես էլ վայրի թռչունների հետ շփումից հետո: 

H5N1 ենթատեսակը գրիպի A վիրուսն է, որը երբեմն «թռչնագրիպ» են անվանում, այն տարածված է ինչպես վայրի, այնպես էլ ընտանի թռչունների շրջանում, որը միաժամանակ վերջերս վարակել է նաև կաթնատու անասուններին ԱՄՆ մի քանի նահանգներում և հայտնաբերվել է Մոնղոլիայում ձիերի մոտ:

2024-ին ԱՄՆ-ում գրանցվել է 61 դեպք, հիմնականում ֆերմերային տնտեսությունների աշխատողների վարակված անասունների հետ շփվելու արդյունքում, ինչպես նաև հում կաթ խմող մարդկանց շրջանում: Ըստ որոշ գիտնականների՝ հաջորդ պանդեմիայի «թեկնածուն» հենց «թռչնագրիպի» վիրուսը կարող է լինել։ Ըստ նրանց՝ «թռչնագրիպը», ըստ ամենայնի, 2025 թվականին ավելի մեծ ազդեցություն կունենա կենդանիների առողջության վրա: 

Ի՞նչ վիճակ է Հայաստանում. MediaHub-ը հետաքրքրվեց Հիվանդությունների վերահսկման և կանխարգելման Ազգային կենտրոնից, թե արդյո՞ք Հայաստանում շրջանառում է «թռչնագրիպը»: Կենտրոնից մեր հարցին ի պատասխան նշեցին, որ Հայաստանում այն չի շրջանառում:

Նշենք, որ ԱՄՆ Լուիզիանա նահանգի առողջապահության նախարարությունը նշել է, որ այս դեպքը մինչ այժմ նահանգում գրանցված միակ դեպքն է, այսինքն՝ բնակիչների շրջանում H5N1 «թռչնագրիպի» տարածման ռիսկը ցածր է մնում։

Ավելի վաղ ԱՄՆ հիվանդությունների վերահսկման և կանխարգելման կենտրոնը (CDC) հայտնել է, որ «թռչնագրիպով» վարակման նախորդ դեպքերում մուտացիաներ են հայտնաբերվել: Սակայն նշել են նաև, որ համաճարակի սպառնալիքը շարունակում է մնալ ցածր:

 Հետևեք մեզ՝ այստեղ