Փաշինյանը նոր քաղաքական հաշվեհարդար և շոու է սկսել. ո՞րն է իրական նպատակը

Այսօր առավոտյան հայտնի է դարձել, որ ձերբակալվել է Ազգային հերոս, ՀՀ ԶՈւ գլխավոր շտաբի պետի նախկին առաջին տեղակալ, գեներալ-լեյտենանտ Տիրան Խաչատրյանը: Իրավապահ մարմինները գործի և մեղադրանքի վերաբերյալ մանրամասներ չեն հայտնել՝ պատճառ բերելով պետական գաղտնիք պարունակող տեղեկությունները:

Խաչատրյանի պաշտպանական խումբն իր հերթին հայտարարել է . «Գեներալ-լեյտենանտ Տիրան Խաչատրյանին այսօր առավոտյան ձերբակալել են՝ մեղադրանք առաջադրելու և կալանավորման համար դատարան ներկայացնելու նպատակով: Տիրան Խաչատրյանին առաջադրված մեղադրանքը (ռազմական դրության ժամանակ զինվորական պաշտոնեական անփութություն), որը նա չի ընդունում, առնչվում է 44-օրյա պատերազմի որոշ հանգամանքների: Նախաքննական և ռազմական գաղտնիքի ներքո, այս փուլում չենք կարող ավել մանրամասներ հաղորդել, սակայն կրկնում ենք` Տիրան Խաչատրյանն իրեն առաջադրված մեղադրանքը չի ընդունում և նույն հանգամանքների վերաբերյալ քանիցս տվել է սպառիչ և հանգամանալից նախաքննական ցուցմունքներ ու որևէ կերպ չի խոչընդոտել նախաքննությանը»:

Հիշեցնենք, որ Տիրան Խաչատրյանը Ազգային հերոսի կոչում է ստացել պատերազմի ամենաթեժ պահին՝ 2020 թվականի հոկտեմբերին։ Ընդ որում, շատերն են հատկապես շեշտում, որ նրա գործունեությունը առավելագույնս թափանցիկ է եղել, որքանով թույլ է տվել նրա զբաղեցրած պաշտոնը: Ուշագրավ է, որ պատերազմից անցել է ավելի քան 4 տարի, առավելագույնս բոլոր հանգամանքներն ուսումնասիրված են, ըստ մամուլում առկա հրապարակումների՝ Տիրան Խաչատրյանը ոչ մեկ անգամ ցուցմունք է տվել, և չկա փաստացի որևէ փաստ, որ նա պաշտոնական անփութություն է ցուցաբերել:

Ըստ այդմ, արդեն իսկ սոցցանցերում կան լուրջ կասկածներ, որ գործ ունենք Նիկոլ Փաշինյանի հերթական քաղաքական հաշվեհարդարի հետ՝ մի կողմից՝ ազդեցիկ անձանց մեկուսացնելու, մյուս կողմից՝ առաջիկա նոր հանձնումներին ընդառաջ հանրության ուշադրությունը շեղելու նպատակով: Իսկ որ նա նոր զիջումների ու հանձնումների է գնալու, այդ մասին արդեն իսկ կան հավաստի տեղեկություններ: Ավելին, կան տեղեկություններ, որ նա ցանկանում է Ալիևի հետ համաձայնել՝ ադրբեջանցիների՝ Հայաստանում բնակեցման հարցի շուրջ: Սակայն նույն ՔՊ-ում, մեր աղբյուրների փոխանցմամբ, կան լուրջ տարակարծություներ:

Մյուս կողմից՝ կա տպավորություն, որ սա Նիկոլ Փաշինյանի՝ տարիներ շարունակ տարվող ևս մեկ «քաղաքականության» շարունակությունն է: Խոսքը պատերազմի իրական հերոսներին վարկաբեկելու քայլերի մասին է: Պատահական չեն Փաշինյանի արհեստական «հերոսապատումները»՝ հարկ վճարողի, շարքային քաղաքացու մասին: