Ռուսաստանում գրիպի համաճարակի պատճառով դպրոցականներն արձակուրդ են գնում

Ռուսաստանում գրիպի  և սուր շնչառական վարակների աճի հետևանքով փակվում են դպրոցներն ու մանկապարտեզները: Շրջաններից գալիս են նոր տեղեկություններ կարանտին հայտարարելու և ուսումնական հաստատությունների փակվելու մասին:

Նովգորոդի շրջանի դպրոցականները փետրվարի մեկից մեկ շաբաթով արձակուրդ կգնան` պայմանավորված երկրում խոզի գրիպի համաճարակով և սուր շնչառական հիվանդություններով: Այս մասին հաղորդում է «Արմենպրես»-ը՝ վկայակոչելով «ՏԱՍՍ» գործակալությունը:

«Փետրվարի 1-7-ը 1-11-րդ դասարանի աշակերտները կմեկնեն չնախատեսված արձակուրդի: Մենք տեղեկություն ենք ստացել տարածաշրջանայի «Ռոսպոտրեբնադզոր»-ից, որ անհրաժեշտություն է առաջացել այս պարագայում պաշտպանել երեխաներին վարակից»,- ասել է մարզային բաժնի ղեկավար Ալեքսանդր Շիրինը:

«Ռոսպոտրեբնադզոր»-ի տվյալներով` հիվանդածությունների 68 տոկոսից ավելին մինչև 14 տարեկան երեխաներն են: Վերջին 4 օրերի ընթացքում շրջանում գրանցվել է գրիպի և սուր շնչառական վարակների 5 հազար դեպք: Վերջին տվյալներով Նովգորոդի շրջանի լաբորատոր հետզաոտությունների արդյունքում գրանցվել է A տիպի (H1N1) առկայության 59 դեպք:

Վերջին տվյալներով` Օմսկի շրջանում չնախատեսված արձակուրդի են անցել ավելի քան 200 դպրոցականներ: Հունվարի 29-ից չնախատեսված արձակուրդի են անցել նաև Մուրոմի բոլոր դպրոցներում: Ուսումնական գործընթացը կանգնեցվել է նաև Կալուգայում:

Ռյազանի մարզում խորհուրդ է տրվել փետրվարի 1-ից մեկ շաբաթով արձակուրդի ուղարկել առաջին դասարանցիներին: Ուսումնական գործընթացը դադարեցվել է նաև Խակասիում, Նովոսիբիրսկում, Յարոսլավլի շրջանում և Յակուտիայում:

Գրիպի համաճարակից Ռուսաստանում մահացել է 126 մարդ: 

Լուսանկարը` ТАСС