Անթույլատրելի է SMS գրել պատգամավորին, ասել՝ մանդատդ վայր դիր. Պատգամավորը զրո չի. Հովիկ Աղազարյան

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

ԱԺ ՔՊ խմբակցությունը լքած Հովիկ Աղազարյանը խորը ցավ է ապրում, որ լքել է ՔՊ խմբակցությունը: «Որովհետև շատ լուրջ ճանապարհ ենք անցրել սրի, հրի, ջրի, կրակի միջով: Ես ամեն ինչ արել եմ, որ այսպես չլինի, բայց գալիս է պահ, որ քայլ ես անում, որ օտարվում ես»,- NEWS.am-ի հետ զրույցում նշեց նա:

«Միգուցե սխալ ես անում, խանգարում ես թիմին, միգուցե ուրիշ նպատակ ունես, որովհետև փորձառություն կա, ուզում ես երիտասարդ գործընկերներին ճիշտ ճանապարհի վրա դնել, ուղղորդել: Այստեղից էլ երբեմն հասնում է  անտագոնիզմի աստիճանի և լինում է այսպիսի արդյունք:

Ես հույս ունեմ՝ իմ քայլը կնպաստի, որ իմ նախկին գործընկերները ավելի համախմբված լինեն իրար հետ, ավելի սիրեն իրար և ավելի միահամուռ ծառայել այն գաղափարներին, որի համար մենք ճամփա ենք ելել, և այդ գաղափարները չոտնահարեն, հանուն «վեհ» գաղափարների: Որովհետև հանուն վեհ գաղափարների դու չես կարող ստոր քայլեր անես, այդ դեպքում դու վեհ գաղափարներին չես հասնի»,-ասաց Աղազարյանը՝ հավելելով, որ իր կյանքում երկրորդ անգամ է պարտվում, եւ երկու անգամ էլ իր ընկերների կողմից. առաջինը ՀՅԴ-ի ժամանակ, երկրորդը՝ հիմա»,-ասաց նա:

Խոսելով այն մասին, որ Նիկոլ Փաշինյանը SMS- է գրում եւ հորդորում դնել պատգամավորի մանդատը, Աղազարյանն ասաց. «Եթե ով է ինչ-որ մեկը խորհուրդ է տալիս վարչապետին, որ կարելի է SMS գրել պատգամավորին, ասել՝ մանդատդ վայր դիր, դա անթույլատրելի է, պատգամավորը զրո չի: Վարչապետը 100 միավոր է, ես 0.01 միավոր եմ, բայց զրո չեմ: Այն հինգը ձայնը, որ իմ ընտանիքի անդամները չտային ՔՊ-ին, միգուցե ՔՊ-ն չհաղթահարեր կամ հերթը կհասներ ցուցակի 157-րդ համարին: Հետևաբար պատգամավորի հետ չի կարելի այդպես վարվել: Եթե պատգամավորի հետ դու այդ ձևով վարվես, դու այդ ինստիտուտը ոչնչացնում ես: Հիմա իրենք մեկը մյուսից առաջ են ընկնում, որ ցույց տան, որ Հռոմի պապից ավելի կաթոլիկ է։ Ես մի հարցազրույցում ասել եմ, որ այդ  ձևի Վազգեն Սարգսյան լուսավոր տղուն սարքեցին Վազգեն, ու սպանել տվեցին: Հիմա էլ Նիկոլ Փաշինյան լուրջ, ինձ համար շատ-շատ կարևոր պետական քաղաքական գործչին ուզում են կտրել իր արմատներից, բարձրացնեն վերև, ամեն մեկը իր նեղ անձնական մերկանտիլ շահը հետապնդելով: Կտրեն, թողնեն օդում, կտրվի իր արմատներից, որ սպանեն»,- հայտարարեց Աղազարյանը:

 Հետևեք մեզ՝ այստեղ