Դիլիջանում կպայքարեն նախկին եւ ներկա քաղաքապետերը

Հունվարի 26-ին լրացել է փետրվարի 14-ին կայանալիք տեղական ինքնակառավարման մարմինների ընտրություններում թեկնածուների գրանցման վերջնաժամկետը։ Հիշեցնենք,որ այդ օրը ընտրություններ տեղի կունենան միաժամանակ Տավուշի մարզի Դիլիջան, Սյունիքի մարզի Տաթեւ եւ Լոռու մարզի Թումանյան համայնքներում:

Թումանյան քաղաքում երկու թեկնածու է առաջադրված՝ գործող քաղաքապետ Լեւոն Զավարյանը եւ Թումանյանի քաղաքապետարանի առաջին կարգի մասնագետ Էդգար Պետրոսյանը: Ի դեպ, երկուսն էլ Հանրապետական կուսակցության ներկայացուցիչներ են, սակայն հանրապետականները սատարում են նախկին քաղաքապետին, իսկ ահա Էդգար Պետրոսյանը հանդես է եկել ինքնառաջադրմամբ։

Ի տարբերություն Թումանյանի՝ Տաթեւ համայնքն ունի երեք թեկնածու՝ նախկին քաղաքապետ, ՀՀԿ-ի կողմից առաջադրված Մուրադ Սիմոնյանը և անկուսակցականներ Իգոր Աբրահամյանն ու Վարշամ Բագրատյանը, ովքեր ինքնառաջադրմամբ են հանդես եկել:

Երեք թեկնածու է առաջադրվել Դիլիջանի քաղաքագլխի ընտրություններում: Ի սկզբանե, գրանցված են եղել երեք թեկնածուներ՝ Դիլիջանի գործող քաղաքապետ, ՀՀԿ-ական Արմեն Սանթրոսյանը, Դիլիջանի նախկին քաղաքապետ, անկուսակցական Ժորա Սահաբալյանը և ՀՀԿ-ական Պապիկ Թամամյանը, ով Դիլիջանի քաղաքապետի խորհրդատուն էր:

Վերջինս իր փաստաթղթերը հետ է վերցրել, երբ հայտնվել է երրորդ թեկնածուն՝ Ժորա Սահաբալյանը, ինչից կարելի է ենթադրել, որ նրա առաջադրումը ունեցել է զուտ ընտրությունները չտապալելու նպատակ: Նշենք, որ նախկին քաղաքապետը առաջադրվել է Հանրապետական կուսակցության կողմից, իսկ Ժորա Սահաբալյանը հանդես է եկել ինքնառաջադրմամբ:

Քրիստինա Տեր-Մաթեւոսյան