Լիբանանի դեմ հարձակումներն ահաբեկչական ակտ են և զանգվածային սպանություն. «Հեզբոլլահ»-ի առաջնորդ

Իսրայելական ավիացիան մի շարք հարվածներ է հասցրել Լիբանանի հարավում գտնվող մի քանի բնակավայրի միաժամանակ:  Լիբանանյան «Հեզբոլլահ» շարժման առաջնորդ Հասան Նասրալլան իր ելույթի ժամանակ Իսրայելին մեղադրել է Լիբանանում փեյջերներ պայթեցնելու համար: Այս մասին տեղեկացնում է Al Jazeera-ն։

Նշվում է, որ նա համոզմուք է հայտնել, թե Իսրայելի իշխանությունները գիտեին, որ 4000-ից ավելի փեյջերներ կան, և միաժամանակ փորձել են սպանել 4000 մարդու։ Նրա տվյալներով՝ նույնը կրկնվել է երկրորդ օրը՝ նպատակ ունենալով սպանել դյուրակիր ռադիոսարքեր ունեցող հազարավոր մարդկանց։

«Հեզբոլլահ»-ի առաջնորդը Լիբանանի դեմ հարձակումները «ահաբեկչական ակտ» և «զանգվածային սպանություն» է որակել: Նա ընդգծել է, որ այդ գործողությունները պատերազմի հայտարարություն են Լիբանանի ժողովրդին և երկրի ինքնիշխանությանը։

«Լիբանանում էլեկտրոնային սարքերի պայթյունները ահաբեկչություն և ցեղասպանություն են, որոնք տանում են դեպի պատերազմ հայտարարելուն: Հակառակորդը անցել է բոլոր կարմիր գծերը՝ վտանգելով Լիբանանում մեծ թվով խաղաղ բնակիչների կյանքը»,-հայտարարել է «Հեզբոլլահ» շարժման գլխավոր քարտուղար Հասան Նասրուլլան և հավելել. «Անկասկած, պատասխան կլինի»:

«Հեզբոլլահ»-ի առաջնորդի խոսքով՝ շարժումը ստեղծել է մի շարք քննչական հանձնաժողովներ՝ ուսումնասիրելով տարբեր սցենարներ։ Նա նշել է, որ բոլոր մանրամասները կպարզվեն, բայց հապճեպ եզրակացություններ անել պետք չէ։ Միևնույն ժամանակ Նասրալլան խոստովանել է, որ «աննախադեպ» հարձակումները լուրջ հարված են հասցրել անվտանգությանը։