Ովքե՞ր են եղել պատգամավորների առաջին սերերը

Orer.am-ը գրում է.

Orer.am-ն այս անգամ իր ընթերցողներին է ներկայացնում ԱԺ պատգամավորների անձնական կյանքից մի փոքրիկ հատված՝ կապված առաջին սիրո հետ: Խոսելով խորհրդարանի ներկայացուցիչների հետ՝ պարզ դարձավ, որ քաղաքականությունը ստիպել է պատգամավորներին ավելի պրագմատիկ լինել՝ մոռանալով իրենց կյանքի ամենագեղեցիկ ակնթարթները:

Ինչպես նշեց ԱԺ ՀՀԿ խմբակցության պատգամավոր Լեռնիկ Ալեքսանյանը, ինքն ամուսնացել է բավական ուշ՝ 38 տարեկանում, սակայն սիրահարվել է վաղ տարիքում: «Ինչպես երեւի բոլորը, այդպես էլ ես, սիրահարվել եմ դպրոցական տարիքում: Այդ սիրուց մնացել են գեղեցիկ հիշողություններ: Նրա անունը Կարինե էր, քաղաք Էջմիածնից էր: Այն ժամանակ տարբեր դասարանի երեխաների հետ հանդիպումներ էինք ունենում, ու ես այդ ժամանակ տեսնում էի իրեն, շփվում էինք: Դպրոցն ավարտելուց հետո ամեն ինչ փոխվեց, մենք առիթների ժամանակ հանդիպել ենք, իհարկե, սակայն արդեն իրավիճակն ու զգացմունքն այլ էին»,- պատմեց պատգամավորը:

Նույն կուսակցության պատգամավոր Հովհաննես Սահակյանն էլ խոստովանեց, որ քաղաքականությունը, մասնավորապես պետաիրավականի նախագահ լինելն այնքան պրագմատիկ է դարձրել իրեն, որ ռոմանտիկ բաների մասին արդեն մոռացել է: «Իհարկե, հիշում եմ առաջին սերը, ռոմանտիզմը, չարաճճիությունները, որոնք հիմա էլ են անպակաս իմ կյանքից»,- ասաց Հ. Սահակյանը հավելելով, թե առաջին սերը՝ որպես կանոն, ուսուցչուհու կամ դասընկերուհու հետ է կապված: «Պատանեկան տարիքից հետո սերն ավելի հաստատուն բնույթ է կրում, որի արդյունքում էլ ձեւավորվում է ընտանիք: Սիրո ամենալավ դրսեւորումը երեխաներն են, գիտեք, ես ունեմ երկու հրաշք երեխա: Ունեմ հայ ավանդապաշտ ընտանիք, որի համար շնորհակալ եմ ու երջանիկ»,- ասաց պատգամավորը:

Իսկ ԲՀԿ խմբակցության պատգամավոր Լյովա Խաչատրյանը, ով մինչ օրս այդպես էլ չի գտել իր երկրորդ կեսին, զրույցի ժամանակ նշեց, որ սիրահարվել է դպրոցական տարիքում, իսկ թե ով է գրավել ներկայիս պատգամավորի սիրտը ժամանակին, նա այդպես էլ չմտաբերեց:

Սոսե Չանդոյան