Համացանցում հայտնվել է ԻՊ-ի տեսագրությունը՝ Փարիզում ահաբեկչություն իրականացրած զինյալներով

 Համացանցում հայտնվել է տեսագրություն, որում ներկայացված են Փարիզի ահաբեկչական գործողություններին մասնակցած զինյալները: «Իսլամական պետություն» ահաբեկչական խմբավորման անունից զետեղվել է տեսահոլովակ, որտեղ նրանք գլխատել են մի քանի պատանդների: Այդ մասին, ինչպես տեղեկացնում է «Արմենպրես»-ը, գրել է The Telegraph-ը:

Կադրերը նկարահանվել են անցյալ տարվա նոյեմբերին տեղի ունեցած հարձակումից առաջ, բայց հրապարակվել են հունվարի 24-ի երեկոյան: Թե երբ է ստույգ նկարահանվել հոլովակը՝ հայտնի չէ:

Նրանց թվում, ովքեր տեսագրության մեջ մահապատիժ են իրականացրել, Բիլյալ Հադֆին է, որը ոչնչացվել է Փարիզում իրականացված գրոհի ժամանակ:

Ցուցադրված է նաեւ Աբու ալ Կիտալ Ֆարանսին, որը, ինչպես ենթադրվում է, «Բատակլան» համերգասրահում կրակ բացած զինյալներից մեկն է:

Հոլովակում «անհավատների» հասցեին սպառնալիքներեն հնչում Լոնդոնի Թաուերի կամրջի եւ Սուրբ Պետրոսի տաճարի լուսանկարների ֆոնին: Ահաբեկիչների պնդմամբ՝ իրենք պատրաստ են հարվածներ հասցնել «ցանկացած ժամանակ, ցանկացած վայրում»:

Կադրերում՝ նշանառության տակ ներկայացված է նաեւ Մեծ Բրիտանիայի Համայնքների պալատի խոսնակ Ջոն Բերկոուն:

Տեսագրությունն ավարտվում է «անհավատների» հետ հաշվեհարդարի հերթական սպառնալիքներով:

Ենթադրվում է, որ դա զինյալների վերջին տեսագրությունն է այն բանից առաջ, երբ նրանք մեկնեցին Ֆրանսիա եւ իրականացրին ահաբեկչությունը:

2015 թվականի նոյեմբերի 13-ի երեկոյան Փարիզում կատարվել են մի շարք ահաբեկչական գործողություններ, որոնց հետեւանքով զոհվել է 130 մարդ, տուժել է եւս ավելի քան 350 հոգի: Դրանց պատասխանատվությունն ստանձնել է «Իսլամական պետություն» ահաբեկչական խմբավորումը: