Ազատ ոճի ըմբշամարտի Հայաստանի մեծահասակների հավաքականը Կիեւում կմասնակցի խոշոր միջազգային մրցաշարի

Ազատ ոճի ըմբշամարտի Հայաստանի մեծահասակների հավաքականը հունվարի 31-ից փետրվարի 12-ը ուսումնամարզական հավաք կանցկացնի Կիեւի մերձակայքում գտնվող Կոնչա-զասպա առողջարանային բնակավայրում: Այս բնակավայրում է գտնվում Կիեւի հանրահայտ  «Դինամո» ֆուտբոլային ակումբի մարզաբազան: Ինչպես հաղորդում է«Արմենպրես»-ը, ըմբշամարտի պաշտոնական կայքի տեղեկատվության համաձայն, հվաքից անմիջապես հետո հայ ըմբիշները հանդես կգան փետրվարի 12-14-ը Ուկրաինայի մայրաքաղաքում կայանալիք խոշոր միջազգային մրցաշարի:

Ուսումնամարզական հավաքին եւ միջազգային մրցաշարին կմասնակցի 14 ըմբիշ. Գարիկ Բարսեղյան, Գառնիկ Մնացականյան (57 կգ), Վոլոդյա Ֆրանգուլյան (61 կգ), Դավիթ Սաֆարյան (65 կգ), Վալտեր Մարգարյան (70 կգ), Գրիգոր Գրիգորյան, Վարուժան Կաջոյան (74 կգ), Մուսա Մուրթազալիև, Շամիր Աթյան, Հաջիմուրադ Նուրմոգամեդով, Սարգիս Հովսեփյան (86 կգ), Էդգար Ենոքյան, Անդրանիկ Գալստյան (97 կգ), Լեւոն Բերիանիձե (125 կգ):

Հավաքականի գլխավոր մարզիչ Արայիկ Բաղդադյանի տրամադրած տեղեկատվության համաձայն, հավաքի ընթացքում իրեն կօգնեն հավաքականի մարզիչներ Հովսեփ Հովսեփյանն ու Հաբեթնակ Կուրղինյանը, ինչպես նաեւ թիմի բժիշկը: Մրցաշարի ժամանակ թիմին կմիանա միջազգային կարգի մրցավար Սամվել Հարությունյանը: Բաղդադյանի խոսքերով, Կիեւում վերջնականապես կորոշվի մարտի 8-13-ը Ռիգայում Կայանալիք Եվրոպայի առաջնության Հայաստանի ընտրանու կազմը: