Ոստիկաններն Իսպանիայից Հայաստան են տեղափոխել սպանության համար 13 տարի հետախուզվող Արմեն Ավետիսյանին

 ՀՀ ոստիկանության օպերատիվ խումբը հունվարի 22-ին Մադրիդ-Մոսկվա-Երևան չվերթի ինքնաթիռով Հայաստան է տեղափոխել Արմեն Ավետիսյանին, ով 13 տարի միջազգային հետախուզման մեջ էր Երևանում սպանություն կատարելու համար։ 2003 թ. հունվարի 7-ին, ժամը 18.30-ի սահմաններում, Երևանի Կողբացու փողոցի թիվ 53 շենքի դիմաց «Կալաշնիկով» ինքնաձիգից նա կրակել է «ՎԱԶ-21213» մակնիշի ավտոմեքենայի վրա՝ վարորդ Արթուր Մկրչյանին սպանելու նպատակով: Դեպքի հաջորդ օրը վերջինս, ստացած հրազենային վնասվածքից, հիվանդանոցում մահացել է:

Ձեռնարկված միջոցառումներով ոստիկանները պարզել են կրակողի ինքնությունը՝ 1982 թ. ծնված Արմեն Ավետիսյան: Նրան հայտնաբերել և քրեական պատասխանատվության ներկայացնել չի հաջողվել: Ավետիսյանի նկատմամբ հայտարարվել է միջազգային հետախուզում, և օպերատիվ-հետախուզական ու որոնողական լայնածավալ միջոցառումները շարունակվել են:
ՀՀ ոստիկանության կազմակերպված հանցավորության դեմ պայքարի, քրեական հետախուզության գլխավոր վարչությունների, Հայաստանի և Իսպանիայի Թագավորության Ինտերպոլի ազգային կենտրոնական բյուրոների համագործակցությունը տվել Õ § ցանկալի արդյունքը: Ինչպես «Արմենպրես»-ը տեղեկացավ ՀՀ ոստիկանության պաշտոնական կայքից, 2015 թ. ապրիլի 21-ին Արմեն Ավետիսյանը Իսպանիայում հայտնաբերվել է և կալանավորվել, իսկ 2016 թ. հունվարի 22-ին ՀՀ ոստիկանության օպերատիվ խմբի կողմից Մադրիդ-Մոսկվա-Երևան չվերթի ինքնաթիռով տեղափոխվել Հայաստան և փոխանցվել ոստիկանության Շենգավիթի բաժնի ծառայողներին: