Դա նրա հինգերորդ երեխան էր․ նոր մանրամասներ Պետերբուրգի հիվանդանոցում երեխային կորցրած հայ կնոջ դեպքից

Past.am

Ինչպես արդեն տեղեկացրել ենք, Սանկտ-Պետերբուրգի Ալեքսանդրովյան հիվանդանոցում արտասովոր միջադեպ է տեղի ունեցել։ Բժիշկները հրաժարվել են օգնել արյունահոսող հայ հղի կնոջը, արդյունքում նա կորցրել է երեխային։ Պատմության մասին հայտնի է դարձել, երբ մի ականատես երիտասարդ նկարահանել է տեղի ունեցածն ու տեղադրել տեսանյութը համացանցում։ Ես երդում չեմ տվել

Շոկային այս տեսանյութը մի երիտասարդ է նկարահանել։ Հիվանդանոցում նստած բժիշկները չեն օգնում արյունահոսող կնոջը, նրա ամուսինն է մի կերպ սայլակ գտնում, որ կնոջը նստեցնի։

«Բժիշկները նստած են ու չեն օգնում, թքած ունեն, դուք ախր Հիպոկրատի երդում եք տվել»,- ասում է նկարահանող երիտասարդը։

«Մենք շտապօգնության բժիշկ ենք, ոչ թե ընդունարանի»,- ի պատասխան՝ ասում է բժիշկներից մեկը։ Նկարահանող տղան ինքն էլ չի օգնում կնոջը, ասում է՝ ես երդում չեմ տվել, դուք տվե եք։

Խայտառակ միջադեպ

Ավելի ուշ պարզվել է, որ դեպքը տեղի է ունեցել Ամանորի նախաշեմին։ Հիվանդանոց են բերել Հայաստանի քաղաքացի 39-ամյա Լիանա Զաքարյանին, բժիշկների ուշացնելու արդյունքում նա կորցրել է երեխային։ Կնոջ կյանքին վտանգ չի սպառնում, նա հունվարի 3-ին դուրս է գրվել հիվանդանոցից։

Իսկ տեսանյութը նկարահանող տղան ինքն է այն ուղարկել լրատվամիջոցներին։

«Ես նրան խնդրեցի ոչ մի բան համացանցում չտեղադրել։ Ով է նրան նման իրավունք տվել։ Սա մեզ համար խայտառակություն է, հիմա մեր բոլոր բարեկամները գիտեն այդ մասին»,- ասում է Լիանայի ամուսինը՝ Սամվելը։

Նա պատրաստվում է դատի տալ տեսանյութի հեղինակին։ Հատկապես, որ իր ընտանիքը շտապօգնության բժիշկների հանդեպ ոչ մի պահանջ չունի։ «Իմ կինը 4 ամսական հղի էր։ Դա մեր հինգերորդ երեխան էր։ Նա գիշերը շատ վատացավ, ուժեղ ցավեր ուներ։ Չկարողացա զանգահարել շտապօգնություն, որոշեցի ինքս տանեմ հիվանդանոց։ Շենքի դիմաց արյունահոսություն սկսվեց»,- պատմում է Սամվելը։

Ալեքսանդրովյան հիվանդանոցի գլխավոր բժշկի տեղակալ Տատյանա Զայցեւան ասել է, որ իրենք տեսել են տեսանյութն ու ստուգումներ սկսել։ «Պարզեցինք, որ տեսանյութի բժիշկները մեր աշխատակիցները չեն։ Նրանք հիվանդի էին բերել։ Իսկ այդ կինն ինքնուրույն էր եկել բժշկի, նրան ուղեկցողները մեր ընդունարանի աշխատակիցներին չէին տեղեկացրել, որ նա այնտեղ կանգնած է։ Երբ տեղեկացել ենք, որ հիվանդի են բերել, ամբողջական բուժօգնություն ենք ցուցաբերել։ Նա էլ մինչ օրս որեւէ բողոք չի հայտնել»,- ասել է բժշկուհին։