Սոչիում մեկնարկել է «Բանանց»-ի ուսումնամարզական հավաք. հայտնի է թիմի ստուգողական հանդիպումների ծրագիրը

Երևանի «Բանանց»-ը Սոչիում սկսել է առաջին արտասահմանյան ուսումնամարզական հավաքը 2015/16 մրցաշրջանի երկրորդ հատվածին պատրաստվելու շրջանակներում: Ինչպես «Արմենպրես»-ին տեղեկացրին երևանյան ակումբի մամուլի ծառայությունից, առաջին ուսումնամարզական հավաքին մասնակցում են 21 ֆուտբոլիստներ. Ստեփան Ղազարյան, Ալբերտ Օհանյան, Գրիգոր Մակարյան, Վլատկո Դրոբարով, Նարեկ Պետրոսյան, Գևոգ Խուլոյան, Ասլան Կալմանով, Սոսլան Կալմանով, Հակոբ Հակոբյան, Պետրոս Ավետիսյան, Վահագն Այվազյան, Միգել Լոպես, Նաիրի Մինասյան, Վալտեր Պողոսյան, Կլաուդիո Տոռեխոն, Զավեն Բադոյան, Վլադիմիր Բաբայան, Հովհաննես Իլանգյոզյան, Լաերսիո Գոմես Կոստա, Ացամազ Բուրաև, Էդգար Մովսիսյան:

Հայտնի է նաև թիմի ստուգողական հանդիպումների գրաֆիկը: Հունվարի 27-ին «Բանանց»-ի մրցակիցը կլինի «Սոչի» թիմը, հունվարի 30-ին «Բանանց»-ը կխաղա Արմավիրի «Տորպեդո»-ի հետ, իսկ փետրվարի 2-ին մեր թիմը տարբեր կազմերով երկու հանդիպում կանցկացնի Կալինինգրադի «Բալթիկա»-ի հետ:

«Բանանցն» իջևանել է Սոչիի «Սպուտնիկ» հյուրանոցում, որտեղ ժամանել է հունվարի 22-ի առավոտյան: Ցերեկը տեղի է ունեցել թիմի առաջին մարզումը: Չնայած անձրևային եղանակին, թիմն անցկացրել է նախատեսված մարզումը: Հունվարի 23-ից «Բանանց»-ը երկուական մարզում կանցկացնի Սոչիում: Երևան թիմը կվերադառնա փետրվարի երեքին: