Նախորդ տարի ՀՀ առողջապահության նախարարությունը «Թեժ գծով» ստացել է 13 հազար 776 հեռախոսազանգ

ՀՀ առողջապահության նախարարության «Թեժ գիծ» ծառայությունը 2015 թվականին  գրանցել է 13 հազար 776 հեռախոսազանգ, 2014թ. 11 հազար 208-ի փոխարեն. քաղաքացիների դիմելիությունն աճել է գրեթե 20%-ով:

Ինչպես տեղեկացրին ՀՀ առողջապահության նախարարությունից, հեռախոսազանգերից  224-ը բողոքներ են պարունակել, որոնց կապակցությամբ ուղարկվել են գրություններ Երևանի և մարզերի բժշկական կենտրոններին, հարուցվել են վարչական վարույթներ, բուժաշխատողների նկատմամբ կիրառվել են բանավոր զգուշացումներ, կարգապահական տույժեր, աշխատանքից ազատումներ: Քաղաքացիների կողմից բարձրացված հարցերը, մասնավորապես բողոքները զեկուցվում են ՀՀ առողջապահության նախարարին:

Նշենք, որ  ՀՀ առողջապահության նախարարության «Թեժ գիծ» ծառայության նպատակն է իրազեկել և պահպանել, անհրաժեշտության դեպքում նաև վերականգնել  քաղաքացիների, հիվանդների, ինչպես նաև բուժաշխատողների առողջապահական իրավունքը: Առողջապահության նախարարությունը կարևորում է հիվանդ-բուժաշխատող իրավահարաբերությունները, մեր բնակչության իրազեկվածությունն առողջապահության բնագավառում: Հասարակության իրավագիտակցությունը հնարավորինս բարձրացնելու նպատակով կատարվում է աշխատանք:

Ցանկացած անձ իր առողջապահական իրավունքների  և պարտականությունների մասին տեղեկատվություն կարող է ստանալ զանգահարելով 010 52-88-72 հեռախոսահամարին, որը հասանելի է 24 ժամ, կամ գրել [email protected]  կամ [email protected]  էլեկտրոնային հասցեին: