Ցանկության մութ օբյեկտ իսկական ծովահենների համար. «Փաստ»

«Փաստ» օրաթերթը գրում է.

Բոլորին են գրավել Կարիբյան ծովում կռվող ծովահենների և կապիտանների մասին պատմությունները: Մերօրյա ծովահենները հեռու են նրանցից, որոնք հավերժացել են Ռաֆայել Սաբատինիի վեպերում: Ծովահեններին, իհարկե, ռոմանտիկ անվանել չի կարելի։ Այնուամենայնիվ, յուրաքանչյուր երեխա գիտի, թե ինչ խմիչք են խմում ծովահենները: Իսկ եթե արդեն 18 տարեկան եք, ապա կարող եք փորձել իսկական «ծովահենի ռոմ», որի արտադրության տեխնոլոգիան հիմա էլ առանձնապես չի փոխվել։ Միայն այն ավելի համեղ է դարձել, իսկ տարաները՝ շատ ավելի գեղեցիկ: Խոսքը համեմատաբար երիտասարդ Բարսելո ռոմի մասին է, որը հայտնվել է «միայն» 1929 թվականին։ Այսօր այդ ռոմը կարելի է գտնել աշխարհի ավելի քան երկու տասնյակ երկրներում, իսկ արտադրվում է Դոմինիկյան Հանրապետությունում։ Ընկերությունը հիմնադրվել է երկու եղբոր՝ Խուլիան և Անդրե Բարսելոների կողմից, որոնք գաղթել էին Դոմինիկյան Հանրապետություն։

Իրենց աշխատասիրության և գործարար խելամտության շնորհիվ նրանք արագ են հասել հաջողության և ճանաչման: Եվ դա՝ չնայած այն հանգամանքին, որ նրանք սկսել են սեփական ռոմը փոքր խանութներ մատակարարելով։ Մի քանի տարի նրանք լրջորեն նեղել են իրենց մրցակիցներին, բայց հետո աղետ է եղել։ Ուժեղ փոթորիկը մեծ վնաս է հասցրել կղզուն, իսկ եղբայրների գործարանը փլվել է։ Անդրեն հիասթափված որոշել է տեղափոխվել Պուերտո Ռիկո, իսկ եղբայրը որոշել է նորից սկսել: Այդ ժամանակվանից սկսած Բարսելո ռոմը միայն աճ է ունեցել։ 1980 թվականին Միգել Բաչելոն՝ հիմնադրի որդին, ստեղծեց ռոմ, որը ընկերությանը հասցրել է նոր բարձունքների և արդեն մոտ կես դար ընկերության բրենդն է:

«Բարսելո իմպերիալ» ռոմը 80-ականներին դարձել է երկրի լավագույն ռոմը, իսկ 90-ականների սկզբին սկսել է վաճառվել նաև արտասահմանում: Արդեն 1994 թվականին այդ ռոմը կարելի էր գտնել ավելի քան տասը երկրում։ Այն ամենամեծ ժողովրդականությունը ձեռք է բերել Իսպանիայում, որտեղ էլ ներկայում գրանցում է ամենաշատ վաճառքը։ Հատկանշական է, որ գրեթե բոլոր երկրներում այդ ռոմը վաճառվում է մոտավորապես նույն կարգախոսով. «Սա ցանկության մութ օբյեկտ է»։ Բանն այն է, որ արտահանվում է միայն հնեցված ռոմ։ Լավագույն եղեգնից պատրաստված ռոմը հնեցվում է բուրբոնի համար նախատեսված տակառներում, որոնք արտադրվում են Կենտուկիում։ Հնեցումից հետո ընկերության վարպետները ստեղծում են խառնուրդներ, որոնք էլ հանվում են վաճառքի։ Օրինակ՝ «Ռոն Բարսելո Իմպերիալը» 10 տարվա հնեցման է և երկու անգամ նվաճել է աշխարհի լավագույն ռոմի տիտղոսը։ Եթե բացահայտումների դարաշրջանի ծովահենները իրենց ժամանակ փորձեին այս ռոմը, նրանք հաստատապես իրենց բազան կստեղծեին ոչ թե Ջամայկայում, այլ Դոմինիկյան Հանրապետությունում։

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում