Վահան Բաբայանն անդրադարձել է ԵԽԽՎ հայաստանյան պատվիրակության ղեկավարի փոփոխության խոսակցություններին

ԵԽԽՎ հայաստանյան պատվիրակության անդամ, ԱԺ ԲՀԿ խմբակցության պատգամավոր Վահան Բաբայանը վեհաժողովի հայաստանյան պատվիրակության ղեկավարի փոփոխության մասին ոչինչ չի լսել: Այս մասին պատգամավորն ասաց հունվարի 19-ին լրագրողների հետ հանդիպմանը՝ անդրադառնալով մամուլում շրջանառվող խոսակցություններին, թե ԵԽԽՎ հայաստանյան պատվիրակության ղեկավար Հերմինե Նաղդալյանին կփոխարինի ՀՀԿ խմբակցության պատգամավոր Սամ վել Ֆարմանյանը: «Ես պատվիրակության ղեկավարի փոփոխության մասին  ոչինչ չեմ լսել»,- «Արմենպրես»-ի հաղորդմամբ՝ ընդգծեց Բաբայանը:

Նա հավելեց, որ մեղավորներ փնտրելու փոխարեն բոլորը պետք է ջանասիրաբար աշխատեն: «Պատվիրակության ղեկավարից չի կախված, թե ինչ մոտեցումներ կունենան մեր հակառակորդ երկրները, մեր դեմ տրամադրված այն քաղաքական գործիչները, ովքեր փորձում են Եվրոպայում հակահայկական լոբբինգ իրականացնել: Դա պատվիրակության ղեկավարի ֆունկցիաների մեջ չի մտնում»,- ասաց պատգամավորը:

Վահան Բաբայանը վստահեցնում է, որ Հերմինե Նաղդալյանը փայլուն կերպով կատարում է իր պարտականությունները Ստրասբուրգում: «Մենք երբեք չենք կանգնել նման խնդրի առաջ, որ պատվիրակության ղեկավարը իրենից կախված ինչ-որ բան չի արել: Ես կարծում եմ, որ աշխարհաքաղաքական առումով էլ բավականին բարդ իրավիճակ է ստեղծվել, և այս դեպքում անձերի խնդիր, պատվիրակության անդամների կամ կազմի խնդիր չկա: Գիտեք, որ պատվիրակությունը ձևավորվում է խորհրդարանական խմբակցություններից, և մենք էլ միշտ պատրաստ ենք եղել զիջել մեր տեղը այն մարդկանց, ովքեր կարող են մեզանից լ ավ աշխատել»,- եզրափակեց Բաբայանը: