Նույն դիրքից 3 հոգու ճակատագիր անհայտ է, որից մեկը հայրս է․ ենթադրվում է, որ նա գերության մեջ է

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Առուշանյանների ընտանիքի համար նախորդ տարվա սեպտեմբերյան դեպքերը ճակատագրական դարձան։ 

Գագիկը MediaHub-ին պատմում է հոր՝ 60-ամյա Վաչիկ Առուշանյանի մասին, որին փնտրում են արդեն 5 ու կես ամիս, իսկ որոնումներն արդյունք չեն տալիս։ Գրեթե բոլոր կառույցները նույն պատասխանն են տալիս․ «սպասեք»։

«Վերջին անգամ նրա հետ խոսել եմ սեպտեմբերի 19-ի երեկոյան, պատասխանել է, ձայնը լսելն ու կապը խափանվելը մեկ եղավ։ Դրանից հետո բոլոր փորձերս եղել են անիմաստ, որովհետև Արցախի ամբողջ տարածքում կապ չի եղել։ Ավելի ուշ մորս հաջողվել է խոսել, էլի նույն կերպ՝ պատասխանել է, ձայնն այլևս չի լսվել»,- ասում է նա։

Առուշանյանների ընտանիքը 2 անգամ են բռնի տեղահանվել։ 2020-ին Հադրութի շրջանի Դրախտիկ գյուղից տեղահանվելուց հետո Վաչիկը՝ կնոջ Սուսաննայի հետ, ապրում էր Ստեփանակերտում։ Մի շարք սոցիալ-կենցաղային խնդիրների վրա աչք փակելով՝ հաղթահարել են, ոտքի կանգնել։ 

Գագիկն ասում է, որ աշխարազորի շարքը համալրել է միայն վերջին օրերին։ Սեպտեմբերին նրա 2-րդ ու վերջին հերթափոխն էր: «Որևէ մեկի մտքով չի անցել, որ լայնամասշտաբ պատերազմ է սպասվում։ Իրենք հերթափոխով դիրք էին պահում, այդ օրը՝ Շոշի ուղղությամբ։ Տարածքից անհետ կորել է փաստորեն սեպտեմբերի 20-ին»,- ասում է նա: 

Դիրքի անդամներից 4-ը ողջ են մնացել, մեկ հոգի զոհվել է, նույն դիրքի անձնակազմից 3 հոգու ճակատագիր անհայտ է։ Գագիկը խոսել է փրկված տղաներից մեկի՝ Դավիթի հետ, նա ասել է, որ վերջին անգամ Վաչիկին ողջ է տեսել, իսկ թե ինչ է եղել հետո՝ Գագիկը հիմա դժվարանում է պատասխանել։ 

Ադրբեջանը պաշտոնապես չի հայտնում 2023 թվականի սեպտեմբերյան գործողությունների ընթացքում գերիներ ունենալու հանգամանքը: «Մեր ընտանիքը կարծում է, որ հայրս գերության մեջ է։ Շոշ-Մխիթարաշեն հատվածում փրկարարներին ադրբեջանցիները 3 անգամ հետ են ուղարկել, չեն թողել աշխատեն, միայն 4-րդ անգամ ստացվել է։ Այդ տարածքից դիեր են իջեցրել, որից մեկը՝ հենց հորս գտնվելու դիրքից, բայց իր մասին տեղեկություն, կամ գոնե անձնական իր չկար»,- ասում է մեր զրուցակիցը։ 

Արցախցի 60-ամյա տղամարդու կինը, 2 զավակներն ու 4 թոռներն ամեն րոպե սպասում են հրաշքի։ Արցախի կորստից հետո Վաչիկի անհայտ ճակատագիրը գիշեր ու ցերեկ մտատանջում է ընտանիքի անդամներին։

Հունան Թադևոսյան

Առավել մանրամասն` այստեղ. https://t.me/arm24live