«Հանուն դերի պատրաստ եմ սափրել գլուխս, բայց երբեք չեմ դիմի պլաստիկ վիրահատությունների». Էմմա Սապունջյանը՝ նոր դերի և արտաքին փոփոխությունների մասին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Դերասանուհի Էմմա Սապունջյանը լսարանին հայտնի է մի շարք հեռուստանախագծերից, բայց վերջին շրջանում դերասանուհին ակտիվ ներգրավվածություն ունի սիթքոմներում և հումորային հեռուստասերիալներում: Այս շրջանում դերասանուհին զբաղվածություն ունի «Հոպարի գանձերը» հումորային սերիալում: Tert.am Life-ը զրուցել է դերասանուհու հետ նոր նախագծի, դերի և նկարահանման ընթացքի մասին: 

«Այս նախագծում ես մարմնավորում եմ գլխավոր հերոսուհուն՝ Թագուհի Խաչունցին, որն ընտանիքի միակ աղջիկ ժառանգն է: Խոսելով կերպարի մասին՝ կարող եմ նշել, որ ընտանիքի միակ սթափ և կշռադատված կերպարն է, իսկ դա հեռուստադիտողը կտեսնի, երբ ծանոթանա ընտանիքի մյուս անդամների հետ»,- ասաց Էմմա Սապունջյանը: 

 

Ամիսներ առաջ նկարահանող թիմը մեկնել է Եգիպտոս, որտեղ կայացել են հիմնական նկարահանումները, բայց մի շարք նկարահանումներ իրականացվել են Հայաստանում: Մեզ հետ զրույցում դերասանուհին պատմել է արտերկրում կայացած նկարահանումների և դրանց բարդության մասին՝ շեշտելով, որ նկարահանումները բարդացնում էին եղանակային պայմանները: 
«Չնայած մարմնավորելով գլխավոր հերոսուհու՝ հասցրել եմ թե՛ հանգստանալ, թե՛ աշխատել: Տեսարաններն ունեին այնպիսի դասավորվածություն, որ մենք կարողանում էինք համակարգել ընդհանուր աշխատանքն ու ժամանակ հատկացնել հանգստին, օգտվել լողավազանից և համատեղել աշխատանքն ու հանգիստը: Նկարահանումների ընթացքում մեզ անընդհատ ասոցացնում էի մուլտֆիլմի հերոսների հետ, երբ մեկին բերում էին, իսկ մյուսը՝ գնում»,- պատմեց դերասանուհին: 

 

Խոսելով դերի կերտման բարդությունների մասին դերասանուհին նշեց՝ բարդ էր մարմնավորել դրական կերպար, որը գնացել էր Եգիպտոս հորեղբոր վերջին ցանկությունը կատարելու:  

«Առօրյա կյանքում երբեմն կոպիտ եմ հաղորդակցվում և մարդիկ կարող են դա վերագրել ագրեսիայի, իսկ կերպարը դրական էր և պետք էր հնարավորինս բացառել այդ գործոնը, իսկ դա ինձ բարդ էր տրվում: Պրոդյուսերները հաճախ շեշտում էին, որ ես դրական կերպար եմ և պետք է պահեմ հերոսուհուս խառնվածքը՝ չխառնելով Էմմային և Թագուհուն: Դերասանի մասնագիտությունը պահանջում է որոշակի կետեր, իսկ տեղանքը, սցենարը, անձնակազմը հարթում են ճանապարհը դեպի կետերի իրագործում: Այս նախագծի պարագայում մենք ծանոթ էինք սցենարին և քաջատեղյակ էինք՝ ինչպես է զարգանալու պատմությունը»,- անկեղծացավ նա: 

 

Էմմա Սապունջյանը պարբերաբար նկարահանվում է նախագծերում, որոնք ունենում են էքստրեմալ պայմաններ, մասնավորապես վերջին նախագծերից «Գերիները»  և «Արյունոտ խաղադրույք» նկարահանվել են այդ ձևաչափով: 

«Ես բավականին մեծ փորձ ունեմ էքստրեմալ պայմաններում նկարահանվելու, այս նախագիծն ինձ համար հանգիստ էր և չեմ կարող դասել այդպիսինների շարքին, քանի որ «Հոպարի գանձերը» լի էր թե՛ դրական էներգիայով, թե՛ տեսարանների բարդությամբ: Բարդ պայմաններում նկարահանել ենք «Արյունոտ խաղադրույք»-ը, որտեղ մարմնավորում էի Լուիզային, որն իմ հակապատկերն էր և մտածում էր միայն իր հարմարավետության մասին»,- հավելեց Էմման։

 

Դերասանուհին հաճախ է դիմում արտաքին փոփոխությունների հանուն դերի, բայց մեզ հետ զրույցում անկեղծացավ՝ ինչի պատրաստ չէ հանուն դերի: 
«Չեմ դիմի պլաստիկ վիրահատության հանուն դերի, քանի որ պատրաստ չեմ դեմքիս վրա տեսնել փոփոխություններ: Սանրվածքի առումով բաց եմ փոփոխությունների համար, կարող եմ անգամ սափրել գլուխս, ներկել վարսերս և այլն, քանի որ հաճախ դա պահանջում է հենց մասնագիտությունը»,- նշեց Էմմա Սապունջյանը: 

 

Անդրադառնալով վերջին կերտած կերպարներից մեկին, որտեղ դերասանուհին մարմնավորել է թմրամոլի նշեց, որ այնուամենայնիվ՝ արձագանքը դրական էր: 

««Գերիները» նախագծի միջոցով մենք փորձել ենք հեռուստադիտողին ճիշտ ներկայացնել թմրամոլության հետևանքները՝ չռոմանտիզացնելով իրավիճակը: Մենք ցույց ենք տվել, թե ինչի արդյունքում է երիտասարդ աղջիկը դարձել թմրամոլ և ինչպիսին է դարձել իր կյանքը՝ թմրանյութեր օգտագործելով»,- եզրափակեց դերասանուհին: 

 

Սվետլանա Դավթյան  

Առավել մանրամասն` այստեղ. https://t.me/arm24live