Ակտիվիստին ուղղված սպառնալիքները քրեական գործի հիմք են դարձել

«Ֆեյսբուք» սոցիալական ցանցի օգտատերերից մեկը ակտիվիստ Զարուհի Հովհաննիսյանի հասցեին սպանության սպառնալիքներ է հնչեցրել, եւ, ինչպես հայտնում է ՀՀ քննչական կոմիտեի դեպարտամենտի տեղեկատվության եւ հասարակայնության հետ կապերի բաժինը, Արաբկիրի քննչական բաժնում քրեական գործ է հարուցվել:

Զարուհի Հովհաննիսյանը 2016 թվականի հունվարի 5-ին գրավոր հաղորդում է ներկայացրել ՀՀ ոստիկանության ԿՀԴՊ գլխավոր վարչություն առ այն, որ «Ֆեյսբուք» սոցիալական ցանցի օգտատեր ոմն Անդրե Մակարով նույն կայքում հաղորդագրությունների միջոցով իր հասցեին տվել է սպանության սպառնալիքներ:

Պարզվել է, որ Անդրե Մակարովը հանդիսանում է Երեւան քաղաքի բնակիչ Անդրանիկ Ավետիսյանը, ով 2016 թվականի հունվարի 4-ին՝ ժամը 22:58-ին, գաղտնի պահելով իր ով լինելը, «Ֆեյսբուք» սոցիալական ցանցի միջոցով վիրավորել է Զարուհի Հովհաննիսյանին, վերջինիս հասցեին տվել սպանության սպառնալիքներ, ապա` արգելափակել իր էջը։ Նշված գործողությունները Զարուհի Հովհաննիսյանի մոտ առաջացրել է տագնապի, վտանգի զգացում եւ վերջինս Ավետիսյանի սպառնալիքներն ընկալել է իրական՝ իրականացման համար, եւ հաջորդ օրը ներկայացրել է գրավոր հաղորդում։

Նախապատրաստված նյութերն ստացվել են Արաբկիրի քննչական բաժնում։ Նկատի ունենալով, որ նյութերը պարունակում են ՀՀ քրեական օրենսգրքի 137-րդ հոդվածի 1-ին մասով նախատեսված հանցագործության հատկանիշներ, եւ Զարուհի Հովհաննիսյանը պնդել է իր բողոքը, Քննչական կոմիտեի Արաբկիրի քննչական բաժնում հունվարի 15-ին հարուցվել է քրեական գործ։ Կատարվում է նախաքննություն։

Գագիկ Աղբալյան