«Ես սովորեցի երջանիկ լինել»․ ինչպես է ապրում աշխարհի ամենատգեղ կինը (լուսանկարներ)

Past.am

26-ամյա Լիզզի Վալասկեսը ԱՄՆ Տեխաս նահանգից ճանաչվել է «աշխարհի ամենատգեղ կին»։ Բայց նա այդ փաստը ծանր չի տանում։ Հակառակը, Լիզզին գտել է իր երջանկությունը եւ սովորել է սիրել իրեն այնպիսին, ինչպիսին կա։ Նա այդ մասին պատմել է իր «Աշխարհի ամենատգեղ կնոջ պատմությունը, որը դարձավ ամենաերջանիկը» գրքում։

Երազանքը՝ գիրանալ Բազմաթիվ կանայք ու աղջիկներ երազում են նիհարել, ամեն ինչ անում են դրա համար։ Իսկ Լիզան հակառակը, երազում էր գիրանալ։ Նա պատմել է, որ ստամոքսի խանգարումներ չունի, ծնողներն իրեն լավ են պահել, բայց հիմա կշռում է այնքան, ինչքան երկրորդ դասարանում։

«Երբ ես ծնվեցի, ոչ ոք ոչ մի վատ բան չէր կասկածում։ Փոքր ժամանակ ես սովորական երեխա էի, միայն շատ նիհար էի։ Հետո պարզվեց՝ ես լուրջ գենետիկ հիվանդություն ունեմ, այնքան բացառիկ հիվանդություն, որ աշխարհում ինձնից բացի 2 հոգի ունի միայն։ Ես երկու լուրջ վիրահատություն եմ տարել, աչքիս մեկը չի տեսնում։ Ես սովոր եմ տարօրինակ հայացքներին, ինձ փոքրուց ծաղրում էին, ու ես բարկանում էի ինձ, իմ հիվանդության ու ողջ աշխարհի վրա»։

4 միլիոն դիտում YouTube-ում

«Մի անգամ ես YouTube-ում տեսանյութ տեսա, որտեղ հանկարծ ինձ գտա։ Այն կոչվում էր «Աշխարհի ամենատգեղ կինը», այն 4 միլիոն դիտում ուներ եւ հազարավոր մեկնաբանություններ։ Ինձ էին քննարկում։ Չե կարող բառերով ասել, թե ինչ ցավ զգացի։ Մարդիկ զարմանում էին, թե ես ինչպես ինքնասպան չեմ լինում՝ նման արտաքին ունենալով։ Ես այդ ժամանակ որոշեցի վրեժ լուծել բոլորից՝ իմ հաջողություններով»։

Գտավ իր կոչումը

«Երկար ժամանակ իմ միակ նպատակը բոլորի նման տեսք ունենալն էր։ Ես մտածում էի, որ իմ արտաքինի պատճառով մարդիկ չեն ցանկանում շփվել ինձ հետ։ Ուր գնայի՝ մարդիկ հեռու էին գնում ինձնից, վատ հայացքով նայում ինձ։ Եւ այսքան տարվա մեջ այդպես էլ չկարողացա սովորել այդ հայացքներին։

Բայց ես գիտեի՝ ես լավ մարդ եմ՝ լավ բնավորությունով։ Եւ մի օր որոշեցի ամեն ինչ սկզբից սկսել։ Ցուցակ գրեցի, թե ում եմ սիրում եւ ում եմ շնորհակալ։ Թե ով է ինձ սիրում՝ անկախ ամեն ինչից։ Հետո սկսեցի կրոն ուսումնասիրել ու կրոնի դասատու դարձա։ Իհարկե, իմ կյանքն իդեալական չէ, բայց հիմա հասկացել եմ՝ ինձ համար միեւնույնն է, թե իմ մասին ինչ են մտածում օտար մարդիկ, ես գտել եմ կյանքում իմ դերը»։