«Աղավնատուն». բնության շնչով և բնության գրկում կառուցված հյուրատունը

Տավուշի Աղավնավանքում զբոսաշրջիկների սիրելի կանգառներից մեկը դարձել է «Աղավնատուն» հյուրատունը։ Հյուրատան մի կողմում Դիլիջանի ազգային պարկն է, մյուսում՝ Կարմիր գրքում գրանցված կենիների պուրակը։

Հյուրատան հիմնադիրը ծնունդով Աղավնավանքից Ալեքսան Ներսիսյանն է, ով մինչև հյուրատան կառուցումը հարազատ գյուղում ուղեկցում էր զբոսաշրջիկների խմբերին, ծանոթացնում տեղի պատմամշակութային վայրերին, համագյուղացիների տանը համեղ հյուրասիրություն կազմակերպում։ Հետո որոշեց սկսել սեփական գործն ու կառուցեց 5 սենյակից բաղկացած «Աղավնատունը», որը գինի-հյուրատուն կոնցեպտով է. այստեղ են արտադրվում «Կինէա» գինիները, որոնք անունը ստացել են հայ կնոջ պատվին։

Ալեքսանի՝ հյուրատան կառուցման գաղափարին հավատացին գործընկերները. հյուրատունը Ակբա Ֆեդերացիայի և Գերմանիայի բնության պահպանության միության՝ NABU-ի «Գյուղական տուրիզմի զարգացման» ծրագրի շահառուներից է: Տրամադրված դրամաշնորհի միջոցով Ալեքսանը նորոգել ու կահավորել է հյուրատունը։

«Հյուրատան սենյակները տարբերվում են ջերմությամբ, որովհետև այստեղ ահռելի սեր ու հոգի ենք դրել։ Յուրաքանչյուր դետալի ու պատերի վրա ձեռքի աշխատանք է եղել. բնությունն է նկարված ամեն տեղում։ Սկզբում այստեղ փոքր ռեստորան էր, որտեղ միայն սնունդ էինք մատուցում։ Հետո գաղափար առաջացավ ստեղծել մի բան, որի շուրջ կարելի է կենտրոնանալ։ Եվ դա «Աղավնատունն» է։ Ակբա Ֆեդերացիայի ու NABU-ի հետ համագործակցությունը վաղուց ենք սկսել։ Երբ փոքր ռեստորանից հետո սկսեցինք «Աղավնատան» կառուցման աշխատանքները, հայտարարությամբ տեսանք, որ Ակբա Ֆեդերացիան ու NABU-ն առաջարկում են գյուղական տուրիզմի զարգացման ծրագիր։ Նրանց աջակցությամբ մենք «Աղավնատանը» ներդրում կատարեցինք»,- նշում է Ալեքսան Ներսիսյանը։

Ալեքսանն այժմ մեկ ցանկություն ունի. Աղավնավանքում պետք է զարգացնել բիզնես միջավայրը, որ հարազատ գյուղը դառնա Հայաստանի զբոսաշրջային կարևոր ուղղություններից մեկը։

Ակբա Ֆեդերացիան Ակբա բանկի միակ նշանակալից մասնակիցն է, բանկի բաժնետոմսերում ունի ավելի քան 81 տոկոս  մասնաբաժին: Ակբա բանկում ունեցած մասնակցության շնորհիվ Ակբա Ֆեդերացիան նպաստում է Հայաստանի ողջ տարածքում գյուղատնտեսության, գյուղական շրջաններում փոքր և միջին բիզնեսի զարգացմանը, համայնքների զարգացմանը, գյուղական շրջաններում և համայնքներում բիզնես միջավայրի աշխուժացմանն ու զարգացմանը, նշված ոլորտներում ձեռնարկատիրական գործունեություն իրականացնող յուրաքանչյուր անձի բարեկեցության աճին:

Մանրամասն՝ տեսանյութում։