2015թ. կենսաթոշակային հաշվի տարեկան հաշվետվությունն ստանալու համար անհրաժեշտ է ներկայացնել դիմում

Կենսաթոշակային անհատական հաշվիների վերաբերյալ 2015 թվականի տարեկան հաշվետվությունը ստանալու համար կուտակային բաղադրիչի մասնակիցները մինչև 2016թ. հունվարի 30-ը կարող են մասնակիցների ռեեստրը վարողին ներկայացնել կենսաթոշակային հաշվում արտացոլված տվյալների ստացման մասին դիմում` նշելով հաշվետվության ստացման նախընտրելի եղանակը` թղթային կամ էլեկտրոնային: Ինչպես «Արմենպրես»-ին տեղեկացրին «կենսաթոշակային համակարգի իրազեկման կենտրոն» հիմնադրամից, դիմումները մասնակիցները կարող են ներկայացնել www.epension.amկայքի ԻՄ ՀԱՇԻՎԸ համակարգի կամ հաշվի օպերատորների միջոցով:

Կուտակային բաղադրիչի մասնակիցները,  օրենքով սահմանված կարգով, իրավունք ունեն տարին մեկ անգամ` մինչև ապրիլի 15-ը, անվճար ստանալ տեղեկատվություն նախորդ օրացուցային տարում իրենց կենսաթոշակային հաշիվներում արտացոլված տվյալների վերաբերյալ: Կենսաթոշակային հաշվի վերաբերյալ տարեկան հաշվետվությունում արտացոլվում է հաշվետու ժամանակաշրջանի ընթացքում մասնակցի օգտին կատարված վճարումների, կենսաթոշակային հաշվում առկա կենսաթոշակային ֆոնդերի, ֆոնդերի եկամտաբերությունների և փայերի հետ կապված գործաքների վերաբերյալ ողջ տեղեկատվությունը:&nbs p;

Առաջին անգամ այդ տեղեկատվությունն ուղարկվում է բոլոր մասնակիցներին, իսկ երկրորդ և հետագա անգամները տարեկան հաշվետվություն ստանալու համար մասնակիցները պետք է ներկայացնեն կենսաթոշակային հաշվում արտացոլված տվյալների ստացման մասին դիմում` նշելով կենսաթոշակային տարեկան հաշվետվությունը ստանալու նախընտրելի եղանակը:

Այդ եղանակները երկուսն են` թղթային, որի դեպքում կենսաթոշակային հաշվի տարեկան հաշվետվությունը ուղարկվում է մասնակցի կողմից դիմումում նշված հասցեով, և էլեկտրոնային, որի դեպքում հաշվետվությունը ուղարկվում է մասնակցի ներկայացրած էլեկտրոնային փոստի հասցեով:

Թղթային եղանակի ընտրության դեպքում այդ դիմումը պետք է ներկայացնել յուրաքանչյուր տարի, մինչդեռ տեղեկատվության ստացման էլեկտրոնային եղանակի ընտրության դեպքում հետագա տարիներին հաշվետվությունը մասնակցին ուղարկվում է առանց լրացուցիչ դիմում ներկայացնելու:

2015 թվականի կենսաթոշակային հաշիվների վերաբերյալ տեղեկատվությունը ստանալու համար կուտակային բաղադրիչի մասնակիցները պետք է մինչև 2016թ. հունվարի 30-ը ներկայացնեն կենսաթոշակային հաշվում արտացոլված տվյալների ստացման եղանակի մասին դիմում` www.epension.am կայքի ԻՄ ՀԱՇԻՎԸ համակարգի կամ հաշվի օպերատորների միջոցով:

Դիմումները ներկայացնելու կարգի վերաբերյալ  մանրամասն տեղեկատվություն ստանալու համար քաղաքացիները կարող են զանգահարել 114 անվճար թեժ գծին: