Հոգեհանգստի կարգ և մոմավառություն՝ ի հիշատակ Գյումրիում դաժանաբար սպանված Ավետիսյանների

Գյումրու «Սբ Աստվածածին» (Յոթ վերք) եկեղեցում հունվարի 12-ին երեկոյան տեղի ունեցավ հոգեհանգստի կարգ՝ ի հիշատակ 2015 թվականի հունվարի 12-ին Գյումրիում դաժանաբար սպանված Ավետիսյանների ընտանիքի: Կարգին մասնակցելու և իրենց աղոթքն առ Աստված հղելու նպատակով եկեղեցի էին եկել ինչպես Ավետիսյանների հարազատները, այնպես էլ շատ գյումրեցիներ: Կարգից հետո, եկեղեցու բակում, կազմակերպվեց մոմավառություն: Դեպքից մեկ տարի անց գյումրեցիները վստահ չեն, որ դեպքի մասին բացահայտումներն ամբողջական կլինի:

«Ես էլ եմ ասել, որ դեռ ոչ մի հարց լուծված չէ, բայց գործընթաց է՝ գուցե կլուծվի և բոլոր հարցերի պատասխաներն էլ կստանանք: Ինչուները թող շատանան, բայց վերջում թող բոլոր ինչուների պատասխանները ստանանք»,-«Արմենպրես»-ի հետ ունեցած զրույցի ժամանակ նշեց Շիրակի թեմի առաջնորդ Միքայել եպիսկոպոս Աջապահյանը:

Այն, որ դեռ հարցերը շատ են նշում էին մոմավառությանը ներկա քաղաքացիները:

«Այսօր իհարկե գործընթացը գնում է և դժվար է այդ ընթացքի վերլուծությունները ներկայացնել: Պետք է ամեն ինչ հստակ ներկայացվի հասարակությանը: Հանցագործները Աստծո կողմից պատիժը կկրեն, բայց պետք է նաև որ իրավական պատիժ լինի»,-նշեց Տիգրան Պետրոսյանը:

Հունվարի 12-ին լրացավ Գյումրիում Ավետիսյանների ընտանիքի դաժան սպանության  տարելիցը: Հարազատները մինչ գերեզմաններ այցելելը եղան տանը, որտեղ դեպքից 1 տարի անց բացվեց տան դուռը. տանն ամեն ինչ նույն էր՝ նույնիսկ տոնածառն ու երեխաների խաղալիքները, անկողինները, միայն խուզարկության արդյունքում մի փոքր խառնաշփոթ էր:  Այնուհետև հարազատները, ՀՀ ՏԿԱԻ նախարար Արմեն Երիցյանը, Աժ պատգամավորները, քաղաքային ու մարզային իշխանույթունների ներկայացուցիչները եղան «Շիրակ» գերեզմանատանը, որտեղ հանգչում են Ավետիսյանների ընտանիքի 7 անդամները, ծ աղիկներ դրեցին նրանց շիրիմներին և հարգանքի տուրք մատուցեցին:

Արմենուհի Մխոյան