Սահմանամերձ 23 համայնքի 82 բնակավայր կշարունակի սոցիալական աջակցություն ստանալ պետությունից. նախագիծ. «Փաստ»

«Փաստ» օրաթերթը գրում է.

Տարածքային կառավարման և ենթակառուցվածքների նախարարությունն առաջարկում է փոփոխություններ կատարել «Սահմանամերձ համայնքների սոցիալական աջակցության մասին» օրենքում: Նշվում է, որ այս կերպ կշարունակվի սահմանամերձ համայնքների բնակավայրերին սոցիալական աջակցության տրամադրումը: Կառավարության 2014 թ.-ի դեկտեմբերի 18-ի N 1444-Ն որոշումով սահմանվում են ՀՀ սահմանամերձ համայնքներին տրվող սոցիալական աջակցության փոխհատուցման ենթակա ծավալները, փոխհատուցման կարգն ու այն ստացող սահմանամերձ համայնքների ցանկը: Ներկայումս աջակցություն է ստանում սահմանամերձ 23 համայնքի 82 բնակավայր։

Ըստ մարզերի հետևյալ համայնքներն են ընդգրկված այս ծրագրում՝ Արարատի մարզ՝ Երասխ, Պարույր Սևակ, Գեղարքունիքի մարզ՝ Ճամբարակ, Վարդենիս, Գեղամասար, Վայոց ձոր՝ Արենի, Զառիթափ, Տավուշի մարզ՝ Նոյեմբերյան, Բերդ Ազատամուտ, Այգեհովիտ, Բերքաբեր, Ծաղկավան, Կիրանց, Կողբ, Սարիգյուղ, Սևքար, Վազաշեն, Սյունիքի մարզ՝ Կապան, Գորիս, Տեղ, Տաթև, Մեղրի: Սոցիալական աջակցության ծրագիրը գործում է 2015 թ.-ից և օրենքի գործողության ժամկետը երկու անգամ երկարաձգվել է։ Համաձայն գործող օրենքի, ժամկետը ավարտվում է 2024 թ.-ի հունվարի 1-ից։

Հանրային քննարկման ներկայացված նախագծով առաջարկվում է ևս 3 տարով երկարաձգել գործող օրենքի ժամկետը, ինչը հնարավորություն կտա ցանկում ընդգրկված բնակավայրերի բնակիչներին շարունակել որոշակի փոխհատուցում ստանալ բնական գազին, էլեկտրաէներգիային, ոռոգման ջրին ուղղված վճարների տեսքով, ինչպես նաև օգտվել կառավարության N 1444-Ն որոշմամբ սահմանված այլ փոխհատուցման ծրագրերից։ Նախարարությունն ընդգծում է, որ այս կարգավորման նպատակը սահմանամերձ համայնքներում կյանքի պայմանների բարելավումն է:

Մանրամասները՝ «Փաստ» օրաթերթի այսօրվա համարում