Eurocontrol-ը դրական է գնահատում Հայաստանում օդային երթևեկության անվտանգության մակարդակը

Եվրոպական աերոնավիգացիայի անվտանգության գործակալության (Eurocontrol) գլխավոր տնօրեն Ֆրանկ Բրենները դրական է գնահատում օդային երթևեկության անվտանգության առումով Հայաստանի գրանցած առաջընթացը: «Զվարթնոց» միջազգային օդանավակայանում կատարած շրջայցից հետո լրագրողների հետ զրույցում Ֆրանկ Բրենները նշեց, որ Հայաստանը Եվրոպական աերոնավիգացիայի անվտանգության գործակալությանն անդամակցում է 2006 թվակա նից և 10 տարիների ընթացքում զգալի առաջընթաց է գրանցել, որի արդյունքում բարելավվել են օդային երթևեկության անվտանգության ցուցանիշները: «Մենք այսօր գոհունակություն ենք հայտնում մեր համագործակության ընթացքում գրանցած մեծ առաջընթացի համար»,- «Արմենպրես»-ի հաղորդմամբ՝ ընդգծեց Բրենները:

Նա հավելեց, որ Eurocontrol-ը իր 41 անդամ պետությունների օդային տարածքներով իրականացնում է օրական 31 հազար չվերթ, ինչը գնալով աճելու է: «Աճի տենդենցի հետ մեկտեղ օդային տարածքը շարունակում է մնալ նույնը: Եվ որպեսզի մենք կարողանանք ավելի շատ չվերթներ իրականացնել հաստատուն օդային տարածքի շրջանակներում, մենք պետք է առավել արդյունավետ կազմակերպենք մեր աշխատանքները: Եվ այս առումով Հայաստանը մեզ համար շատ կարևոր նշանակություն ունի, քանի որ, հաշվի առնելով օդային փոխադրումների հնարավոր աճի միտումները, որը հիմնականում նպատակաուղղված է և լինելու է ասիական ուղղությամբ, Հայաստանի օդային տարածքով թռիչքներն անպայման աճելու են»,- նշեց Ֆրանկ Բրենները:

Eurocontrol-ի և Հայաստանի քաղաքացիական ավիացիայի գլխավոր վարչության միջև ստորագրվել է համաձայնագիր, որի նպատակը Հայաստանի աերոնավիգացիոն ոլորտի իրավական և օրենսդրական դաշտի բարելավումն է: Ֆրանկ Բրանների խոսքով՝ դա նպաստելու է օդային անվտանգության մակարդակի բարձրացմանը:

ՀՀ քաղաքացիական ավիացիայի գլխավոր վարչության պետ Արտյոմ Մովսեսյանը նշեց, որ Ֆրանկ Բրանների հետ իրենք շրջայց են կատարել «Հայաերոնավիգացիա» ընկերությունում և «Զվարթնոց» միջազգային օդանավակայանում: «Մենք պարոն Բրաններին ծանոթացրել ենք բոլոր ընթացակարգերին, որ մեր ուղևորներն անցնում են: Մենք ստորագրել ենք համագործակցության համաձայնագիր, որի համաձայն` մենք 50 օր Eurocontrol-ի կողմից անվճար օգնություն ենք ստանալու: Ցանկացած խնդիր, որ Հայաստանի քաղավիացիան կունենա թռիչքային անվտանգության ոլորտում, Eurocontrol-ը պատրաստ է լինելու աջակցել»,- ընդգծեց Մովսեսյանը:

Նա հստակեցրեց, որ Eurocontrol-ի հետ համագործակցությունը հիմնականում վերաբերում է օդային անվտանգության մակարդակի բարձրացմանը օդային տարածքների օգտագործման առումով: «Խոսքը մեր մասնագետների վերապատրաստման, նոր սարքավորումների ներդրման մասին է: Այցը հիմնականում պայմանավորված է թռիչքային անվտանգության մակարդակի գնահատմամբ և ապագայում այս հարցում մեզ աջակցություն ցուցաբերմամբ»,- եզրափակեց Արտյոմ Մովսեսյանը:

Աերոնավիգացիայի անվտանգության եվրոպական կազմակերպությունը համաեվրոպական կառույց է, որի գործունեության նպատակն օդային երթևեկության սպասարկման միասնական եվրոպական համակարգն է: Կազմակերպությունն իրականացնում է աերոնավիգացիայի բնագավառի տեխնիկական զարգացման, օդային երթևեկության կառավարման գործընթացների և թռիչքների անվտանգության հարցերին առնչվող միջոցառումների համալիր եվրոպական ծրագրի մշակումը և անդամ երկրներում դրա ներդրման աշխատանքների համակարգումը: