Ադրբեջանում անցնում են խիստ խնայողության. 2016 թվականի պետբյուջեն կվերանայվի

Էներգակիրների արտահանման վրա հիմնված տնտեսություն ունեցող եւ նավթի համաշխարհային գների շարունակական անկման հետեւանքով տնտեսական ճգնաժամում հայտնված Ադրբեջանում պատրաստվում են փոփոխություն մտցնել 2016 թվականի համար հաստատված բյուջեում, անցնել 4 տարվա տնտեսման ռեժիմի, նվազեցնել պետական ներդրումները, լուրջ բարեփոխումներ կատարել պետական կառավարման համակարգում եւ արագացնել պետական ունեցվածքի մասնավորեցման գործընթացը:

Վկայակոչելով «Ազադլըգ» թերթը, այս մասին Ադրբեջանի նախագահ Իլհամ Ալիեւի նախագահությամբ երեկ տեղի ունեցած կառավարության նիստում հայտնել է ֆինանսների նախարար Սամիր Շարիֆովը:

Շարիֆովը հայտնել է, որ չնայած 2016 թվականի պետական բյուջեում, որը հաստատվել է անցյալ տարվա դեկտեմբերին, բյուջեի ծախսերը 3,1 մլրդ մանաթով կամ 15 տոկոսով արդեն կրճատվել են` կապված նավթի գների անկման հետ, անհրաժեշտություն կա բյուջեն վերանայել այլ հոդվածներով եւս:

Ադրբեջանի արտահանման 95 տոկոսը կազմում են գազը, նավթն ու նավթամթերքները, իսկ երկրի պետբյուջեն 75 տոկոսով ձեւավորվում է էներգակիրների արտահանումից ստացվող եկամուտների հաշվին: 

Ադրբեջանի 2016 թվականի պետբյուջեում նավթի գինը մեկ բարելի համար նախատեսված է 50 դոլար: Ներկայում այն արդեն պետբյուջեում նախատեսվածիցմոտ 18 դոլարով ցածր է:

Ադրբեջանի ազգային արժույթը` մանաթը վերջին մեկ տարում արդեն երկու անգամ արժեզրկվել է: Ներկայում Բաքվի «սեւ շուկայում» ամերիկյան մեկ դոլարը գնվում է 2 մանաթով: