Ավետիսյանների 7 հոգանոց ընտանիքի սպանդից անցել է մեկ տարի

Այսօր լրանում է մեկ տարի, ինչ Գյումրիում գլխատվեց Ավետիսյանների 7 հոգանոց ընտանիքը: Հունվարի 12-ին՝ ժամը 10.00-ի սահմաններում հարևանուհու դուստրը Ավետիսյանների դուռը բաց է գտել, պատուհանները՝ կոտրված։ Մտել, տեսել է, որ գնդակահարված են ընտանիքի 6 անդամները, իսկ վեց ամսական երեխան՝ վիրավորված է, ինչից հետո երեխային տեղափոխել են հիվանդանոց:

ՀՀ Քննչական կոմիտեից հայտնել են, որ դեպքի վայրի զննությամբ հայտնաբերվել են 5.45 մմ տրամաչափի պարկուճներ, 1 պահունակ՝ փամփուշտներով, զինվորական կոշիկներ, որոնց վրա գրված է եղել Պերմյակով ազգանունը։ Հանցագործությունը կատարվել է վաղ առավոտյան, երբ բոլորն անկողնում են եղել։ Պարզվեց, որ ենթադրյալ հանցագործը Գյումրիում տեղակայված 102-րդ ռուսական ռազմակայանի ժամկետային զինծառայող Վալերի Պերմյակովն է։ Մյուս օրն առավոտյան Շիրակի մարզի դատախազ Րաֆֆի Ասլանյանը հայտնեց, որ հունվարի 12-ի, լույս 13-ի գիշերը Բայանդուր գյուղի մոտակայքում ռուս սահմանապահների կողմից հայտնաբերվել է Վալերի Պավելի Պերմյակովը։ Ըստ նախնական տեղեկությունների՝ նա փորձել էր հատել հայ-թուրքական սահմանը:

Հունվարի 14-ին Գյումրիում և Երևանում տեղի ունեցան զանգվածային բողոքի ցույցեր՝ սպանության մեջ մեղադրվող Պերմյակովին Ռուսաստանին չհանձնելու պահանջով։ Նույնը օրը ՀՀ գլխավոր դատախազ Գևորգ Կոստանյանը հայտարարեց, որ նամակով կդիմի ՌԴ գլխավոր դատախազին, կխնդրի, որպեսզի մեղադրվողին հանձնեն հայկական կողմին: Հունվարի 14-ին հիվանդանոցում մահացավ դանակի հարվածներ ստացած փոքրիկ Սերյոժան:

Պերմյակովի դատավարությունը շարունակվում է: