Հրապարակը քաղաքին բնորոշ միջավայր է, սա քաղաքականություն է. Արմեն Մարտիրոսյան

Past.am-ի հարցին՝ ի՞նչ կետի է հասել ընդդեմ էլեկտրաէներգիայի թանկացման շարժումը, «Անտարես» մեդիա հոլդինիգի ղեկավար Արմեն Մարտիրոսյանը պատասխանեց.«Էներգիայի պահպանման օրենքն ասում է, որ էներգիան ոչ մի տեղից չի առաջանում և ոչ մի տեղ չի կորչում: Մեր իշխանությունները տարիներ շարունակ վարել են անխոհեմ քաղաքականություն՝ ավելացնելով ներքին էներգիայի քանակը, որը չի կարող սպառվել և պետք է մի տեղ իրացվի: Եթե այն չիրացվեց այս պահին, ապա կիրացվի վաղը, մյուս օրը և կշարունակվի իրացվել այնքան ժամանակ, մինչև քաղաքացին չստանա սպասվելիք փոփոխությունները՝ կոռուպցիայի վերացում, իշխանության ուժեղացում արտաքին մարտահրավերների դեմ, արդար ընտրություններ, լեգիտիմ իշխանություն: Եթե իշխանությունը գնում է հակաժողովրդական որոշումների,իսկ թանկացման որոշումը այդպիսին է, ուրեմն՝ խնդիրը  միանշանակ քաղաքական է: Հարցն ավելի քաղաքականացվեց այն պահից, երբ իշխանությունն ասաց, որ չի կատարի որոշումը, կամ կկատարի ինչ-որ լղոզված պայմաններով»:

Աուդիտ անելու նախագահի որոշման նպատակահարմարության մասին էլ մասին մեր զրուցակիցը նշեց. «Երբ բոլորը գիտեն, որ մի քանի հոգի գողություն են արել,մեր աչքի տեսածի՞ն հավատանք, թե՞ աուդիտին: Ես դեմ չեմ աուդիտին, սակայն իշխանությունը լավ էլ գիտի ամեն բան: Ես չեմ ուզում այս հարցը տանել դեպի տնտեսական դաշտ, այլ ուզում եմ դիտարկել քաղաքական դաշտում, որովհետև տնտեսական քաղաքականությունը նույնպես քաղաքականություն է, իսկ քաղաքականության հականիշը գեղականությունն է: Մենք բոլորս քաղաքացիներ ենք՝ անկախ նրանից որտեղ ենք ապրում և ցանկացած պահի կարող ենք դուրս գալ հրապարակ: Հրապարակը քաղաքին բնորոշ վայր է: Ով ինչ ուզում է, թող ասի՝ սա քաղաքականություն է»:

Լևոն Փանոսյան