Ռուսական զորքերը առաջ են շարժվում առաջնագծի չորս ուղղություններով, շատ թեժ է. Ուկրաինայի ՊՆ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Ուկրաինայի պաշտպանության փոխնախարար Աննա Մալյարը հայտնել է, որ ռուսական զորքերը առաջ են շարժվում առաջնագծի չորս ուղղություններով, գրում են միջազգային ԶԼՄ-ները։

Նրա խոսքով՝ ռուսական զինված ուժերը ներկայումս ակտիվորեն առաջ են շարժվում Ավդեևկա, Մարինսկի և Լիման ուղղություններով։ «Այժմ ամենուր շատ թեժ է»,- գրել է Ուկրաինայի ռազմական գերատեսչության ղեկավարի տեղակալը Telegram-ի իր պաշտոնական ալիքում։

Միաժամանակ, նրա խոսքով, ուկրաինացի զինվորականները հարձակողական գործողություններ են իրականացնում այլ շրջաններում։ Նա, մասնավորապես, նշում է Ուկրաինայի զինված ուժերի առաջխաղացումը Բախմուտի ուղղությամբ, սակայն ընդունում է, որ այնտեղ իրավիճակը մնում է անկայուն։ Բացի այդ, ինչպես բացատրել է Աննա Մալյարը, Ուկրաինայի զինված ուժերը Զապորոժյեի ուղղությամբ հարձակման ժամանակ բախվում են ռուսական բանակի ծայրահեղ լուրջ դիմադրությանը։

Ավելի վաղ Մալյարն ասել էր, որ անհրաժեշտ չէ ուկրաինական հարձակման արդյունքները չափել «բացառապես անցած կիլոմետրերով»։ Նրա խոսքով՝ Ուկրաինայի զինված ուժերի գործողությունների հաջողության համար կան «շատ ավելի» չափանիշներ։ Թե որոնք են այդ չափանիշները, նա չի հստակեցրել:

Ռուսաստանի պաշտպանության նախարարության ղեկավար Սերգեյ Շոյգուն հայտարարել է, որ Ուկրաինան հունիսի 4-ից փորձում էր հակահարձակում սկսել։ Հունիսի 9-ին ՌԴ նախագահ Վլադիմիր Պուտինը հայտարարեց, որ ուկրաինական հարձակումն արդեն սկսվել է, սակայն ուկրաինացի զինվորականները հաջողություն չեն ունեցել: Վոլոդիմիր Զելենսկու խոսքով՝ հակահարձակման ժամանակ նրանք հանդիպում են շատ լուրջ դիմադրության, սակայն Ուկրաինայի նախագահը իրավիճակը բնութագրել է որպես «ընդհանուր առմամբ դրական»։