Կախված իրավիճակից՝ դպրոցականների արձակուրդը կարող է երկարացվել

Սուր շնչառական վարակով հիվանդությունները եւ H1N1 խոզի գրիպը Ամանորի նախաշեմին բավականին տհաճ անակնկալ էին եւ ստիպեցին մեր պաշտոնյաներին վերանայել կրթական հաստատություններում արձակուրդների ժամկետը։ Արդեն իսկ հայտնի է, որ «հիմք ընդունելով Հայաստանի Հանրապետության առողջապահության նախարարության` ՀՀ կրթության և գիտության նախարարությանն ուղղված միջնորդությունը, համաձայն որի` հանրապետությունում վերջին շրջանում տարածված սուր շնչառական վարակներով և թոքաբորբերով հիվանդների 80 տոկոսը 0-18 տարեկան երեխաներ են, ՀՀ ԿԳ նախարար Արմեն Աշոտյանը հրաման է ստորագրել` ձմեռային արձակուրդները հանրակրթական, նախնական և միջին մասնագիտական ծրագրեր իրականացնող պետական ուսումնական հաստատություններում մինչև սույն թվականի հունվարի 18-ը երկարաձգելու վերաբերյալ»: Համաձայն հրամանի` մինչև ուսումնական տարվա ավարտը կապահովվի առարկայական ծրագրերի կատարումը` դասացուցակներում համապատասխան փոփոխություններ կատարելու և լրացուցիչ դասընթացներ կազմակերպելու միջոցով: Ոչ պետական ուսումնական հաստատություններին ԿԳՆ-ն առաջարկում է առաջնորդվել նույն աշխատակարգով։

«Հնարավո՞ր է, որ արձակուրդները հունվարի 18-ից հետո եւս որոշ ժամանակով երկարաձգվեն»,- հետաքրքրվեցինք ՀՀ կրթության եւ գիտության նախարարի մամուլի քարտուղար Զոհրապ Եգանյանից։ Նա նշեց, որ ամեն ինչ կախված է իրավիճակից, քանի որ հիվանդությունների վերաբերյալ մոնիտորինգ իրականացնում է ՀՀ առողջապահության նախարարությունը եւ հանդես է գալիս համապատասխան առաջակություններով։

Հիշեցնենք, որ անցած տասն օրերի ընթացքում խոզի գրիպից գրանցվել է մահացության երեք դեպք, իսկ սուր շնչառական վարակով հոսպիտալացման 662 դեպք։ Այս պահի դրությամբ 1-ին եւ 2-րդ դասարանցիները կհանգստանան մինչեւ հունվարի 24-ը, իսկ 3-12-րդ դասարանցիների արձակուրդը երկարաձգվել է մինչեւ հունվարի 18-ը: