Հայոց անկախ պետականության վերականգնումը շրջադարձային եղավ հայ ժողովրդի համար

Այսօր մենք տոնում ենք մեր պատմության ամենափառահեղ իրադարձություններից մեկը՝ Առաջին Հանրապետության հիմնադրման օրը, որը հռչակվեց 1918 թվականի մայիսի 28-ին՝ Սարդարապատի, Բաշ-Ապարանի, Ղարաքիլիսայի հերոսամարտերից հետո:

 Հայոց անկախ պետականության վերականգնումը շրջադարձային եղավ և նոր էջ բացեց հայ ժողովրդի նորագույն պատմության մեջ: Այն դարձավ հաղթանակի, վերածննդի ու ազատության խորհրդանիշ յուրաքանչյուր հայի համար:

Հայ ժողովուրդը աննկարագրելի ինքնազոհողությամբ ու սխրանքներով  նվաճեց անկախ պետականություն ունենալու իրավունքը: 

Այսօր էլ մայիսի 28-ի խորհուրդը մեկն է՝ միասնական լինելու դեպքում մենք իսկապես անպարտելի ենք: Ապարանում անցկացվում են  մի շարք միջոցառումներ` նվիրված 1918թ-ի  հերոսամարտերին: Վերջին  տարիներին Ապարանում պարտադիր նշվում է մայիսի 28-ը ։ Այսօր էլ  բազմաթիվ բարձրաստիճան պաշտոնյաներ, հոգեւոր դասի ներկայացուցիչներ, հյուրեր ոչ միայն տեղի, այնպես էլ հարեւան մարզերի համայնքներից եւ մայրաքաղաք Երեւանից  եկել  են  Ապարան , որպեսզի մասնակցեն այդ  միջոցառմանը։

Ապարանի հրապարակից բազմությունը ոտքով շարժվում է  դեպի «Վերածնունդ» հուշահամալիր: Նախ այցելություն կատարում Արցախյան ազատամարտին զոհ գարձած ապարանցիների շիրիմներին: Այնուհետեւ մասնակիցները ուղեւորվում  են  դեպի զորահրամանատար Դրաստամատ Կանայանի (Դրո) գերեզմանոց եւ հերոսի շիրիմը պատում ծաղկեպսակներով:

Այնուհետև իրենց խոնարհումն են հայտնում    բոլոր նրանց, ովքեր ընկել են  հերոսամարտերում: 

Փառք ու պատիվ բոլոր ժամանակներում հայրենիքի համար իրենց կյանքը նվիրաբերած բոլոր անմահներին:

Ներկաները  շնորհավորեցին  այս պայծառ ու կարևոր տոնի առթիվ: Այսուհետ  արժեքավոր այս տոնի խորհուրդը  թող  առաջնորդի մեր ժողովրդին, լույսով ու հավատով լցնի բոլորի սրտերը: Թող մայիսյան հաղթանակները հայրենասիրության, ազատ ու անկախ ապրելու, արարելու, միաբանվելու և նոր մարտահրավերներ հաղթահարելու  ուղենիշ լինեն մեզ համար: Մայիսի 28-ը մեր ժողովրդի համար անդունդի եզրից հետ վերադառնելու օրն է: Դեպի կյանք, դեպի վերածնունդ, դեպի արարում  վերադառնալու օրը: 

Կեցցե՛ Հանրապետության տոնը:

  Գեղեցիկ  Բալեյան ,    Մարինկա   Ալեքսանյան