Ի՞նչ է կատարվում Ադրբեջանում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

«Ադրբեջանում սկսված ներքաղաքական անհանգիստ իրադարձությունները դեռևս ավելի են սրվելու և առաջ բերելու խորքային գործընթացներ»: Այս կարծիքին է ռազմական փորձագետ Մհեր Հակոբյանը:

Վերջինս «Հայկական ժամանակ»-ի հետ զրույցում ասում է, որ ակցիաները դեռևս իշխանափոխության մակարդակի չեն հասել, սակայն իշխանության համար պայքար այդ երկրում մշտապես կա։

«Արցախյան խնդիրն ամենևին էլ Ադրբեջանի հիմնական խնդիրը չէր և չէ, ինչպես փորձում են ներկայացնել։ Պատերազմից 3 տարի է անցել, և ներկայացնում են, թե լուծել են իրենց խնդիրների 75 տոկոսը, բայց, ինչպես տեսնում ենք, մեկը մյուսի հետևից այլ խնդիրներ են արթնանում ադրբեջանական հասարակության շրջանում։ Այստեղ ամենից առաջ պետք է նկատի ունենալ ալիևյան ռեժիմի ավտորիտար և կոռումպացված բնույթը․ նաֆթային բումի ոսկյա 2-3 տասնամյակների ընթացքում Ադրբեջանի հասարակությունը ոչինչ չտեսավ. գումարները Ալիևի և նրա կլանի հաշիվներին մնացին»,- նկատում է Հակոբյանը։

Ըստ նրա՝ այժմ Ադրբեջանում տարածվում է աղքատությունն ու առաջ գալիս սոցիալական բևեռվածությունը։ Ադրբեջանական իսլամական հասարակությունում նման դեպքերն ավելի շատ կրոնական ուղղվածություն են ստանում․ «Պատահական չէ, որ Իրանի հետ հարաբերությունների բարդացող ֆոնին Իրանն ուժեղացնում է այդ կրոնական ծայրահեղության դրսևորումը։ Այսինքն՝ այդ պետությունն ունի աղքատացող մարդիկ, հասարակության դժգոհություն, իսլամական ելք առաջարկող Իրան, որոնց գումարվում են սոցիալական մանր հարցերը»։

Վերջինիս դիտարկմամբ՝ առաջին դեպքը չէ նաև, որ այսպիսի ներքաղաքական իրադարձությունների ֆոնին Ադրբեջանում նախկին զինվորականները փորձել են այրել իրենց։

Հիշեցնենք՝ երեկ մամուլում հերթական տեսանյութ էր տարածվել, որտեղ ադրբեջանցի տղամարդը ցանկանում էր ողջ-ողջ այրել իրեն։ Համաձայն շրջանառվող լուրերի՝ պատճառը սովն է, մարդիկ սոված են, և նրանց պաշտպանող չկա: Ականատեսները հաղորդել են, որ նա զինվորական է։

«Ավտորիտար հասարակություններում շատ բաներ տեսանելի չեն, Ադրբեջանն այդպիսի պետություններից է, բայց այնտեղ էլ կան խնդիրներ, որոնք կուտակվում են ու վերջում պայթում։ Այս ամենը երկարաժամկետ խնդիրների մասին է խոսում, որոնք նաև քաղաքակրթական մակարդակի են հասնում։ Ադրբեջանցիների մի մասը մինչև հիմա էթնիկ փնտրտուքների մեջ է։ Իրենք, ի տարբերություն մեզ, չունեն արժեհամակարգ։ Դեռ հարց է նաև Ադրբեջանում իշխանափոխությունը․ առայժմ Ալիևի կլանին հաջողվում է պահել իշխանությունը, բայց՝ որքան»,- ասում է զրուցակիցը։

Իշխանափոխության Ադրբեջանում գուցե հրահրեն իր դեմ պայքարող ուժերը, կարծում է Հակոբյանը։ Նրա խոսքով՝ որևէ մեկը չի հրաժարվի գահընկեց անել Ալիևին և ձեռքը վերցնել նաֆթային պաշարները։

Հակբոյնաը կարծում է, որ այդ երկրի խնդիրներից մեկն էլ ռուս խաղաղապահների ներկայությունն է Արցախում:

«Արցախյան պատերազմը Ալիևին բոնուսներ տվեց՝ իրեն արդարացնելու համար, ասում է՝ ես ձեզ հաղթանակ տվեցի, ոչինչ որ ավտորիտար ռեժիմ է, կոռումպացված ենք, բայց հայերին ճնշեցինք։ Սակայն շատերը հասկացել են, որ սա հաղթանակ չէ, և իրենք էլ անհանգիստ սպասում են 2025 թվականին, երբ պետք է որոշեն՝ մնո՞ւմ են ռուս խաղաղապահները Արցախում, թե՞ գնում»,- նշում է նա:

Ռազմական փորձագետի խոսքով՝ Հայաստանը պետք է օգտվի Ադրբեջանի ներկայիս վիճակից և փորձի դրանից օգուտներ քաղել։