Քարվաճառցի դպրոցականների համար գիրք նվիրելու օրն իրական տոն դարձնելու առիթ է ստեղծվել

Գիրք նվիրելու օրը կարող է իրական տոն դառնալ քարվաճառցի դպրոցականների համար:Քարվաճառում բնակություն հաստատած Թամարա Գրիգորյանը, ով իր ամուսնու հետ դասավանդում է դպրոցում, ֆեյսբուքյան միջոցառման տեսքով կազմակերպել է գրքահավաք: Կազմակերպիչը կոչ է արել մասնակիցներին նվիրաբերել այնպիսի գրքեր, որոնք իսկապես կհետաքրքրեն դպրոցական տարիքի երեխաներին: «Խնդրում ենք չբերել այն գրքերը, որոնք ուղղակի ձեզ պետք չեն, այլ գրքեր, որոնք կարծում եք, կհետաքրքրեն ձեր երեխաներին, դպրոցական քույրիկներին, եղբայրներին: Գրքերը Քարվաճառ հասցնելը մեզ համար իսկապես դժվար է․պիտի տեղափոխենք միայն նպատակային գրքեր»,-գրել է Թամարա Գրիգորյանը: 

Գիրք նվիրել ցանկացողները կարող են կապ հաստատել Սաթինե Քալանթարյան օգտատիրոջ հետ և մինչև փետրվարի 19-ը նվիրաբերվող գրքերը հանձնել նրան: «Ամեն լավ գիրքը մի լույսի շող է․ լույսի ձեր շողերն ուղղեք դեպի ազատագրված Քարվաճառ․ դրանք մեզ անհրաժեշտ են»,-եզրափակել է Թամարա Գրիգորյանը։

Փետրվարի 19-ին հայ մեծանուն բանաստեղծ Հովհաննես Թումանյանի ծննդյան օրն է, որը Հյաստանում հռչակվել է նաև գիրք նվիրելու օր: Այդ օրը հաստատվել է ՀՀ Գրողների միության նախկին նախագահ, երջանկահիշատակ Լևոն Անանյանի նախաձեռնությամբ 2008 թվականից: Տոնի առթիվ ամեն տարի կազմակերպվում են տարբեր միջոցառումներ: