Շվեդական փոստային ինքնաթիռ Է կործանվել Նորվեգիայի հետ սահմանին, օդաչուներն անհետ կորել են

Շվեդական West Atlantic ընկերության փոստային ինքնաթիռը, որն Օսլոյից չվերթ Էր կատարում Նորվեգիայի հյուսիսում գտնվող Տրոմսյո քաղաք, լույս հունվարի 8-ի գիշերն աղետի Է ենթարկվել շվեդա-նորվեգական սահմանի շրջանում: Երկու օդաչուները՝ 42-ամյա իսպանացի կապիտանը եւ 34-ամյա ֆրանսիացի շտուրմանը, համարվում են անհայտ կորածներ: Այդ մասին, Նորվեգական հեռագրական բյուրոյին (NTV) հայտնել են թագավորության փոստային ծառայության ներկայացուցիչները:

Bombardier CRJ200 ինքնաթիռը ռադարներից կորել Է Երեւանի ժամանակով գիշերվա ժամը մոտավորապես 4-ին, երբ գտնվում Էր Նորվեգիայի անդրբեւեռային Բուդե քաղաքից 120 կիլոմետր հյուսիս ընկած շրջանում: Շվեդիայի նավագնացության պետական վարչությունում նշում են, որ ինքնաթիռն անհայտ պատճառով սկսել Է կտրուկ կորցնել բարձրությունը՝ մեկ րոպեում իջնելով ավելի քան 6,5 կիլոմետր, եւ հսկայական արագությամբ բախվել Է գետնին: Աղետի շրջանը որոշված Է, սակայն դեռ չի հաջողվում այնտեղ հասնել:

Ինքնաթիռը կործանվել Է դժվարամատչելի լեռնային տեղանքում, որտեղ ճանապարհներ չկան եւ օդի ջերմաստիճանն այժմ ըստ Ցելսիուսի ցածր Է 30 աստիճանից: «Ինքնաթիռի բեկորները մոտավորապես 50 մետր շառավղով տարածվել են Ակայաուրե լճի մերձակայքում՝ Նորվեգիայի հետ սահմանից 10 կիլոմետր հեռավորության վրա»,- NTV-ին հայտնել Է փրկության շվեդական օդային ծառայության ներկայացուցիչ Դանիել Լինդբլադը: Նրա խոսքով՝ աղետի վայր են ուղարկվել Շվեդիայի ռազմաօդային ուժերի F-16 ինքնաթիռ, ինչպես նաեւ շվեդական եւ նորվեգական փրկարար ուղղաթիռներ, հաղորդել Է ՏԱՍՍ-ը: