Ռուբեն Վարդանյանը մնալու է և շարունակելու գործունեությունն Արցախում

Արցախի նախկին պետնախարար Ռուբեն Վարդանյանը հայտարարել է, թե մնալու է Լեռնային Ղարաբաղում և շարունակելու է իր գործունեությունը։ «Այո՛, ես մնալու եմ Արցախում և շարունակելու եմ իմ գործունեությունը»,- ասել է Վարդանյանը։ Ռուսական «РБК»-ի հարցին՝ ԼՂՀ կառավարության հետ համագործակցությունը շարունակելու մասին, Վարդանյանն ասել է, թե պատրաստ  է սրան, որտեղ անհրաժեշտ կլինի ընդհանուր գործի համար։ Նրա խոսքով՝ մտադիր չէ լքել Արցախը և շարունակելու է զբաղվել երկրի օգտակար գործունեությամբ, այդ թվում՝ «Մենք ենք, մեր սարերը» բարեգործական հիմնադրամի շրջանակներում։ 

Թերևս պետնախարարի այս հայտարարությունը հերքում է նաև փաշինյանական իշխանության և նրա կամակատար դարձած Արայիկ Հարությունյանի ևս մեկ քարոզչական կեղտոտ թեզ, թե պետնախարարն Արցախում իր գործունեությունը փորձում էր ծառայեցնել Հայաստանում իշխանափոխություն իրականացնելու համար։ Մինչդեռ պարզվեց, որ Ռուբեն Վարդանյանն իրականում ազգային համախմբվածության, միասնության և արդյունավետ աշխատանքի կողմնակից է և իր  բոլոր քայլերը, գործողությունները բխեցնում է հենց այս հանգամանքներից։ Որքան էլ գործող իշխանությունները և նրանց ներկայացուցիչները փորձեն համոզել, թե Ռուբեն Վարդանյանը ընդամենը տրամպլին էր օգտագործում Արցախը, վստահաբար կարելի է նշել, որ նախկին պետնախարարը առայժմ չափազանց կարևոր գործունեություն ունի ծավալելու Արցախում՝ չմոռանալով, իհարկե, Հայաստանում քաղաքական գործունեությունը։

 Հիշեցնենք, որ Վարդանյանը հենց «Ապրելու երկիր» կուսակցության հիմնադիրն է, իսկ այդ կուսակցությունը բավականին լուրջ արդյունքներ է ցույց տվել հատկապես ՏԻՄ ընտրություններում, ուստի և Ռուսաստանի քաղաքականությունից հրաժարված և Արցախում ազգանվեր գործունեությամբ զբաղվող Ռուբեն Վարդանյանի քաղաքական գործունեությունը չեն սահմանափակվելու միայն Արցախով։ Ընդամենը 110 օրում նա կարողացավ զգալի աշխատանք տանել Արցախը միջազգային մամուլի առաջին էջերում ներկայացնելու, Արցախի մասին ողջ աշխարհին պատմելու առումով, և արդյունավետ մենեջերի նրա այս հմտությունները հարկավոր են ոչ միայն Արցախում, այլ նաև Հայաստանում։

Արման Սիմոնյան