«Ազգային-ժողովրդավարական բևեռը» պարբերական կդարձնի Լաչինի միջանցքի բացման պահանջով հավաքները

Դարձի՛ր gg-ի գործընկերը և վաստակիր մինչև 1.000.000 դրամ   
Անցիր ԱՅՍ հղումով և լրացրու օնլայն հայտը՝ https://bit.ly/ggPartner_past-am

«Ազգային- ժողովրդավարական բևեռ» կուսակցությունը պարբերական կդարձնի հավաքներն այնքան ժամանակ, մինչև չբացվի Լաչինի միջանցքը:  Այս մասին հունվարի 15-ին, Գյումրիում տեղակայված 102-րդ ռազմաբազայի մոտ տեղի ունեցած հավաքի ժամանակ նշեց «Ազգային ժողովրդական բևեռի» ներկայացուցիչ Ժիրայր Սեֆիլյանը:

Նշենք, որ «Ազգային- ժողովրդավարական բևեռի» համախոհներն առավոտյան հավաքն անցկացրեցին  Գյումրու Մայր Հայաստան հուշահամալիրի մոտ: Դրանից հետո ավտոերթով շարժվեցին բազայի մյուս մուտքի մոտ, որից հետո իրազեկման ակցիա անցկացրեցին Գյումրու տարբեր հատվածներում: Ավելի ուշ նրանք կրկին ակցիա անցկացրեցին ռազմաբազային հարող հատվածում:

Նախատեսվում էր շուրջօրյա ակցիա անցկացնելու նպատակով վրաններ տեղադրել, սակայն այս անգամ ևս ոստիկանության ուժերն արգելեցին՝ նշելով, որ դա հակասում է ակցիաների անցկացման օրենքին, այն է՝ դրա մասին տեղեկացված չեն տեղական ինքնակառավարման  մարմինն ու Շիրակի մարզպետարանը: Ակցիայի կազմակերպիչները հայտարարեցին՝ քանի որ ոստիկանությունը չի ընդառաջում իրենց, բախումներից խուսափելու համար որոշվել է  ավարտել իրենց հավաքը՝ հույս հայտնելով, որ հաջորդ անգամ նախատեսված հավաքին ավելի շատ մարդ կմիանա։

Նախաձեռնողները նշում են՝ «Շրջափակում հանուն ապաշրջափակման» խորագրով հավաքի նպատակն է, շրջափակելով Գյումրիում ժամանակավոր տեղակայված ռուսական 102-րդ ռազմաբազայի ճանապարհը, պահանջել Լաչինի միջանցքի երկկողմանի անխափան աշխատանքի պատասխանատվությունը ստանձնած ռուսական խաղաղապահներից կատարել իրենց պարտավորությունը։

Նման ակցիա «Բևեռ»-ն անցկացրեց նաև հունվարի 8 -ին՝ փորձելով փակել Գյումրիում դեպի ռազմաբազա տանող հատվածը՝  Մայր Հայաստան հուշահամալիրի մոտակայքում, սակայն ոստիկանության աշխատակիցները ցուցարարներին՝ հիմնականում տղամարդկանց,  բերման ենթարկեցին հավաքների մասին օրենքը խախտելու և ոստիկանների օրինական պահանջներին չենթարկվելու հիմքով: