«Ջերմաչափումից հետո միայն աշակերտները դպրոց են մտել». այսօրվանից դպրոցներում կանխարգելիչ միջոցառումներ են իրականացվում

Դարձի՛ր gg-ի գործընկերը և վաստակիր մինչև 1.000.000 դրամ   
Անցիր ԱՅՍ հղումով և լրացրու օնլայն հայտը՝ https://bit.ly/ggPartner_past-am

Առողջապահության նախարարության պահանջով այսօրվանից սուր շնչառական հիվանդությունների տարածմամբ պայմանավորված՝ Հանրապետության հանրակրթական, նախադպրոցական ուսումնական հաստատություններում եւ ոչ պետական դպրոցներում կանխարգելիչ միջոցառումներ են իրականացվում։ Բոլորը դպրոց մտնելուց առաջ ջերմաչափվում են, բարձր ջերմություն ունեցողների մուտքը ուսումնական հաստատություններում բացառվում է։

«Առավոտյան բուժքույրը ջերմաչափել է բոլորին, որից հետո միայն թույլատրել ենք աշակերտներին մտնել դպրոց։ 80 բացակա ունեինք, բայց սուր շնչառական հիվանդություններով պայմանավորված, ըստ դասղեկների տվյալների՝ 3–ն են եղել, նրանք չէին եկել դպրոց, իսկ դպրոցում սուր շնչառական հիվանդություններով հիվանդ երեխա չենք ունեցել»,– NEWS.am-ի հետ զրույցում ասաց Երեւանի 24 հիմնական դպրոցի տնօրեն Նաիրա Ավետիսյանը։

Տնօրենը այս տարվա ուսումնական առաջին օրվա մեծ թվով բացակայությունները կապում է անբարենպաստ եղանակի հետ, նաեւ շեշտում՝ ձմեռային արձակուրդներից հետո առաջին օրը որպես կանոն բացակայությունների թիվը մեծ է լինում։

«Բժշկական նորմերին համապատասխան ինչ–որ պահանջվում էր՝ իրականցվել է, դասերն ընթացել են բնականոն հունով»,– ասաց 24 հիմնական դպրոցի տնօրենը։

Ըստ ԿԳՄՍ նախարարության Հանրակրթության վարչության պետ Արսեն Բաղդասարյանի՝ եթե որեւէ մեկը ջերմություն ունենա, կամ էլ դասի ընթացքում ինքնազգացողությունը վատանա, պետք է տուն գնա՝ հեռավար տարբերակով կամ էլ բացթողածը հետագայում լրացնելու պայմանով։

«Դպրոցները պատրաստված են եւ Առողջապահության նախարարության ցուցումների համապատասխան բոլոր կանխարգելիչ միջոցառումները իրականցվում են»,– ասաց Արսեն Բաղդասարյանը։

Նրա խոսքով՝ սուր շնչառական հիվանդություններով պայմանավորված բացակաների ճշգրիտ տվյալները կլինեն շաբաթվա վերջին։ Այս տիպի հիվանդությունները հիմնականում տարածված են 0-18 տարեկան անձանց մոտ։

Առողջապահության նախարարության տվյալով՝ տարեսկզբին հանրապետությունում դիտվում է սուր շնչառական վարակների հիվանդացության միջին ակտիվություն։ Հայաստանում առավել շատ շրջանառվում է գրիպի A տեսակի H1N1 ենթատեսակը, որն ընթանում է բավականին ծանր։ Հունվարի 4–ի տվյալով, Հանրապետությունում H1N1 ենթատեսակի վարակից գրանցվել է 2 մահվան դեպք։ Պացիենտներից մեկը 35 տարեկան է եղել, ունեցել է խրոնիկ հիվանդություններ, չորրորդ աստիճանի ճարպակալում։