«ՀՀ իշխանությունն իր կրավորական կեցվածքով կողքից դիտողի կարգավիճակում է». «Փաստ»

«Փաստ» օրաթերթը գրում է

Ադրբեջանը սադրանքների մի ամբողջ շարք սկսելուց հետո կրկին փակեց Արցախը Ադրբեջանը շարունակում է շրջափակված պահել Արցախը: Արցախի «Արդարություն» կուսակցության համանախագահ Հակոբ Հակոբյանը «Փաստի» հետ զրույցում երեկ նշել է, որ Արցախում ժողովուրդը հայտնվել է ծանր վիճակում, քանի որ շրջափակմանը զուգահեռ Ադրբեջանը փակել է նաև գազամատակարարումը:

«Ձմռան շրջանում 120 հազար մարդու նման պայմաններում պահելը հանցագործություն է մարդկության նկատմամբ: Կարծում եմ՝ գնալով էլ ավելի են մեծացնելու ճնշումները՝ փորձելով կոտրել Արցախի ժողովրդի կամքը, ավարտին հասցնել 44-օրյա պատերազմի ժամանակ ունեցած ցանկությունները և երազանքները: Այդուհանդերձ, սա մեզ համար այդքան էլ տարակուսելի չէ, քանի որ Ադրբեջանի ռազմաքաղաքական իշխանությունների ցեղասպան գործելաոճը մեզ համար նորություն չէ»,-նշել է Հ. Հակոբյանը:

Անդրադառնալով Արցախի իշխանությունների քայլերին՝ նա ընդգծեց. «Իրենց ունեցած բազմաթիվ թերություններով հանդերձ, այսօր ԱՀ իշխանություններն ունեն այն մտադրությունները, ինչն ունի Արցախում ապրող հայ ժողովուրդը: Դրա առհավատչյան մասնավորապես դեկտեմբերի 13-ի Անվտանգության խորհրդի նիստի վերաբերյալ տարածված տեղեկություններն էին, ԱՀ ԱԺ հայտարարությունն էր, ինչպես նաև պետնախարարի՝ դեկտեմբերի 13-ին տարածած հաղորդագրությունը: Այս պահի դրությամբ խնդիրը լուծելու առումով ամեն ինչ է արվում ԱՀ իշխանությունների կողմից: Այլ հարց է, թե որքանով կենսունակ կգտնվեն ԱՀ իշխանությունները, կառավարությունը, որպեսզի կարողանան օպտիմալ ձևով բաշխել ռեսուրսները, եղած պահուստային միջոցներով որևիցե կերպ լուծել կենսական խնդիրները»:

ՀՀ իշխանությունների դրսևորած վարքագծին Արցախում, մեղմ ասած, քննադատաբար են մոտենում: «Մենք բազմիցս ենք խոսել այն մասին, որ ձեռքերը լվացել են Արցախից: Այն, ինչ տեղի է ունենում հիմա, մեր բոլոր այդ պնդումների, այսպես ասած, առհավատչյան է: ՀՀ իշխանությունները և մասնավորապես Նիկոլ Փաշինյանը ոչ միայն ձեռքերը լվացել են Արցախից, այլ, միգուցե, բանավոր պայմանավորվածությունների ադյունքում Արցախը արդեն հանձնել են Ադրբեջանին: Իրենց հայտարարությունները և քայլերը որևէ կերպ չեն տարբերվում այլ երկրների, միջազգային այս կամ այն հարթակի հայտարարություններից, որոնք որևէ գործնական, առարկայական աշխատանքի բնույթ չունեն և դեկլարատիվ են: ՀՀ իշխանությունը Արցախում 120 հազար հայ գերիների իրողությանը կողքից դիտող է դարձել: Պաշտոնական Երևանն ուղղակի կողքից դիտում է, թե ինչպես են այդքան մարդկանց գերի վերցրել, սպասելով, թե ինչ ելք է լինելու, որտեղ ինքը որևիցե գործառույթ չունի»,ասաց մեր զրուցակիցը:

Երբ ՀՀ իշխանությունները որևիցե գործուն քայլեր չեն ձեռնարկում, Հակոբ Հակոբյանի խոսքով, ի՞նչ սպասելիքներ կարող ենք ունենալ միջազգային հանրությունից: «Ի՞նչ սպասելիքներ ունենալ այն միջազգային հանրությունից, որը 44-օրյա պատերազմի ժամանակ ֆորմալ հայտարարություններից այնկողմ չանցավ: Ըստ Նիկոլ Փաշինյանի, այդ նույն միջազգային հանրությունն էր պահանջում Արցախի կարգավիճակի նշաձողն իջեցնել: Իհարկե, այլ հարց է՝ ճիշտ էր ասում, թե կեղծում էր: Բայց կարծում եմ, որ այս պահին միջազգային հանրությունը, ի մասնավորի՝ ՄԱԿ-ը մեծ աշխատանք ունի անելու իր իսկ հեղինակությունը փրկելու համար. իր աչքի առջև փորձում են հումանիտար աղետի, սպիտակ ցեղասպանության միջոցով մի ամբողջ ժողովրդի ոչնչացնել: Իր աչքի առջև միջազգային որևիցե նորմ, միջազգային որևիցե կազմակերպության չհարգող երկիրը շրջափակման մեջ է վերցրել Արցախը: Այդ նույն միջազգային կառույցները պետք է առաջին հերթին մտածեն, որ իրենց աչքի առջև մարդկության դեմ հանցագործություն է տեղի ունենում»,-շեշտեց մեր զրուցակիցը:

Հակոբ Հակոբյանի կարծիքով, ճգնաժամի լուծման հիմնական դերակատարները պետք է ՀՀ իշխանությունը, ինչպես նաև Ռուսաստանի Դաշնությունը լինեն: «Այս պահի դրությամբ պետք է քննարկել միայն ու միայն մեկ հարց՝ հիմքում դնելով հետևյալ փաստը. իր 120 հազար բնակչով աշխարհից կտրված է մի երկիր, որտեղ նաև հումանիտար աղետ է: Հաշվի առնելով, որ ՀՀ իշխանությունը 2020 թ. նոյեմբերի 9-ի հայտարարությունը ստորագրող կողմերից մեկն է, ամեն ինչ պետք է անի, որ այդ հայտարարության կողմերը մեկ սեղանի շուրջ հայտնվեն և հարցին լուծում տան. մտածել, թե Արցախը, ԱՀ բնակիչները, շրջափակման մեջ լինելով, կարողանալու են ինչ-որ բան անել, միամտություն կլինի: Այսօր ՀՀ-ն պետք է ցույց տա, որ ձեռքերը չի լվացել Արցախից: Այս ամենից առաջ թեպետ ԱՀ կարգավիճակի հարցի մասին ՀՀ իշխանություններն այլևս չէին խոսում, բայց հայտարարում էին, որ իրենց համար կարմիր գիծ է այնտեղի բնակիչների ֆիզիկական անվտանգությունը, նրանց ապրելու իրավունքը: Վերջին 3 օրը ցույց տվեց, սակայն, որ ՀՀ այս իշխանությունների համար որևիցե կարմիր գիծ չկա, որ հանգիստ կարող են տրորել այդ կարմիր գծերը և իրենք իրենց կրավորական կեցվածքով կողքից հետևել, թե ինչպես են տրորում ՀՀ իշխանության՝ իրենց իսկ հայտարարած կարմիր գծերը»,-եզրափակեց Հ. Հակոբյանը:

ԱՆՆԱ ԲԱԴԱԼՅԱՆ

Մանրամասները՝ «Փաստ» օրաթերթի այսօրվա համարում