Շնորհիվ «Ապրելու» հիմնադրամի` Նոյեմբերյանի քաղաքային զբոսայգին կներկայանա նոր լուծումներով՝ հարմարավետ ու սիրելի հանգստի վայր դառնալով մեծահասակների ու երեխաների համար

Նոյեմբերյանի քաղաքային զբոսայգին և հարակից կենտրոնական շրջանը կկառուցապատվի և կբարեկարգվի: Նախագիծն իրականացվելու է Նոյեմբերյանի համայնքապետարանի, «Ապրելու» հիմնադրամի և «Սկևռա» քաղաքային պլանավորման ինստիտուտի միջև կնքված եռակողմ հուշագրի համաձայն:

Նոյեմբերյան համայնքի ղեկավար Արսեն Աղաբաբյանը, որը համայնքապետ է ընտրվել 2021 թվականի դեկտեմբերին՝ ՏԻՄ ընտրություններում գլխավորելով «Ապրելու երկիր» կուսակցության ցուցակը, նշում է, որ «Ապրելու» հիմնադրամի կողմից իրականացվում է զբոսայգու՝ նոր լուծումներով վերակառուցումը: «Նախագծի հեղինակը «Սկևռա» քաղաքային պլանավորման կազմակերպությունն է: Օրեր առաջ համայնքում տեղի է ունեցել նաև հանրային լսում, նախագիծը հավանության է արժանացել: Հաջորդ տարվանից կսկսենք զբոսայգու վերակառուցման աշխատանքներն՝ ավելի վաղ ստորագրված եռակողմ հուշագրի համաձայն»,-«Փաստի» հետ զրույցում ասում է Աղաբաբյանը:

Հավելում է՝ արդյունքում Նոյեմբերյան համայնքը կունենա նոր լուծումներով, ավելի արդիական զբոսայգի: «Մտածված է յուրաքանչյուր դետալ, տրված են շատ հետաքրքիր լուծումներ: Ուշադրություն ենք դարձրել ամեն մանրուքի վրա, որ այգին հարմարավետ ու սիրելի վայր դառնա բոլորի՝ երեխաների ու մեծահասակների համար»,-նշում է մեր զրուցակիցը:

Անդրադառնալով «Ապրելու» հիմնադրամի հետ համագործակցությանը՝ համայնքի ղեկավարն ընդգծում է՝ բացի զբոսայգու վերակառուցումը, հիմնադրամը ֆինանսավորել է 2022 թվականի սուբվենցիոն ծրագրերը՝ համաֆինանսավորել է մոտ 112,5 մլն դրամի սահմաններում: «Պատրաստվում ենք 2023 թվականի բյուջեին, սակայն թվերը դեռ հստակ չեն»,-նշում է Աղաբաբյանը: Համայնքի 2023 թվականի բյուջեի նախագծի վերաբերյալ հանրային լսումը տեղի է ունենալու տարեվերջին։

«Ապրելու» հիմնադրամն իրականացնում է տարաբնույթ ծրագրեր` զբոսայգու վերակառուցումից և կարևորագույն նախագծերի ֆինանսավորումից մինչև դպրոցների գրադարանների համալրում։ Օրինակ՝ վերջերս սահմանամերձ Ոսկեվան, Ոսկեպար, Բաղանիս, Բերդավան, Կոթի, Դովեղ բնակավայրերի դպրոցները համալրվել էին նոր և ժամանակակից գրականությամբ։ «Ապրելու» հիմնադրամը համայնքապետարանի ներգրավմամբ անակնկալ էր մատուցել դպրոցներին՝ նվիրելով գրադարաններին այդքան անհրաժեշտ գրականությունը։

Վերադառնալով իրականացվող սուբվենցիոն ծրագրերին՝ համայնքապետը նշում է, որ  900 մլն դրամի սուբվենցիոն ծրագրեր են իրականացրել: «Նշեմ, որ նախկինում՝ երեք տարվա ընթացքում, իրականացվել է 200 մլն դրամի ծրագիր: Արդյունքում ասֆալտապատվել ու տուֆապատվել են փողոցներ, լուսավորության մեծ ցանց ենք անցկացնում, ամբողջ մայրուղին՝ մոտ 25 կմ, կլուսավորվի, մշակույթի տներն են վերանորոգվում, տանիքներն են փոխվում, ոռոգման համակարգն է արդիականացվում: Խնդիրները մեկը կամ երկուսը չեն: Ինչպես բոլոր համայնքներում, մենք ևս նմանատիպ խնդիրներ ունենք՝ կապված փողոցների ասֆալտապատման, լուսավորության հետ: Այդ խնդիրները միշտ էլ կան:

Անկեղծ լինելով՝ ասեմ, որ մենք մի փոքր այլ ուղղությամբ ենք մտածում՝ կարևորում ենք աշխատեղերի ստեղծումը, IT ոլորտի զարգացումը: Մարտին Կողբում կբացվի «Թումո» կենտրոնը: Մեծ թվային ստուդիա ենք բացել Կողբի Գեղարվեստի դպրոցում: Արդեն քանի ամիս է, ինչ երկրորդ խմբի դասընթացներ են անցկացվում: Ունենք երեխաներ, որոնք ստուդիայի միջոցով պատվերներ են ստանում և կարողանում գումար վաստակել: Տարածաշրջանը սահմանամերձ է, եթե կարողանանք շատ մարդ ընդգրկել թվային ստուդիայի ծրագրում, պատկերացրեք՝ ով տանը համակարգիչ ունի, անգամ տանից, ստուդիայի հետ կապի մեջ լինելով, կարող է պատվերներ ստանալ և տանը նստած գումար վաստակել: Առաջնահերթ նպատակներից մեկը զբաղվածության հարցը լուծելն է, մյուս հարակից խնդիրները ժամանակի ընթացքում աստիճանաբար ևս լուծում կստանան»,-եզրափակում է Նոյեմբերյան համայնքի ղեկավար Արսեն Աղաբաբյանը:

Լուսինե Առաքելյան