Ինչպես ավտոլվացման խոզանակը դարձավ ձեռքի խոտհնձիչի գյուտի առիթ. «Փաստ»

«Փաստ» օրաթերթը գրում է

Այժմ շատ հաճախ հանգստյան օրերին մարդիկ արթնանում են հարևանի տրիմմերի՝ ձեռքի խոտհնձիչի ձայնից: Դա բավական աղմկոտ, բայց շատ օգտակար սարք է: Իսկ արդյո՞ք այդ հիանալի սարքը վաղուց է ստեղծվել: Պարզվում է՝ ոչ: Այն հորինել է ամերիկացի ձեռներեց և շոումեն Ջորջ Բոլլասը 1971 թվականին: Նախկին զինվորը, որը մասնակցել էր Երկրորդ համաշխարհային պատերազմին և Կորեայի պատերազմին, ամուսնացել էր տանգոյի պարուհու հետ: Բոլլասը ղեկավարել է բազմաթիվ պարային խմբեր, հիանալի ձեռնարկատեր էր և ուներ մի քանի սրճարան, խաղային ավտոմատների սրահներ և հարյուրից ավելի պրոֆեսիոնալ պարողներ: Նրա ամբողջ կայսրությունը կոչվում էր Dance Citi USA Studio: Բոլլասը առանձնապես լավ այգեպան չէր, նրան դժվար էր համարել այգու խնամքի սիրահար. տան հետևի ամբողջ տարածքը լցված էր խոտով, որը պետք էր խնամել: Հիմնական խնդիրը ծառերն էին, քանի որ նրանց տակ եղած խոտը դժվար էր կտրել պարտեզի մկրատով:

Վտանգավոր օձեր նույնպես կարող էին թաքնվել դրանց մեջ: Տրիմմերի գաղափարը նրա գլխում առաջացել է ավտոլվացման կետ այցելելիս: Բոլլասին հետաքրքրել են խոզանակի առաձգական նեյլոնե թելերը, որոնցով մաքրում էին մեքենայի կեղտը: Ավտոմեքենան լվանալուց հետո Ջորջը գնացել է տուն և մի քանի նեյլոնե թելեր անցկացրել թիթեղյա տուփի մեջ, այնուհետև տուփը հարմարեցրել էլեկտրոշարժիչին և փորձարկել ստեղծած սարքը խոտերի վրա: Արդյունքը գերազանցել է բոլոր սպասելիքները: Այդ պահից էլ սկսվել է ժամանակակից տրիմմերների պատմությունը: Weed Eater Inc.- ի ապրանքային նշանը (բառացիորեն անգլերենից թարգմանած՝ «մոլախոտ ուտող»), որը գրանցվել է այդ գյուտարարի կողմից 1971 թվականին, սկզբում շատ լավ շահույթ է բերել: Շուկան պատրաստ էր այդպիսի գյուտերի, և մարդիկ ուրախ էին իրենց փողերը տալ նորույթի համար: Բայց, չնայած գրանցված արտոնագրերին, ժամանակի ընթացքում ավելի ու ավելի շատ այդպիսի «գյուտեր» են մուտք գործել շուկա, և մրցակցությունն աճել է:

Ջորջն ընդունել է Emerson Electric ընկերության առաջարկը ու դեռևս չբացահայտված չափի գումարով վաճառել է իր բիզնեսը: Ներկայումս «մոլախոտ ուտող» Weed Eater- ը գնվել է հայտնի Husqvarna Group ընկերության կողմից և շարունակում է ուրախացնել սպառողին նոր փոփոխություններով: Ժամանակակից տրիմմերները բաղկացած են ձողից, որի մի ծայրում կա էլեկտրական կամ բենզինային շարժիչ, իսկ մյուս ծայրին աշխատանքային գլխիկն է: Բացի շարժիչից (էլեկտրական կամ վառելիքային), տրիմմերները տարբերվում են աշխատանքային գլխիկի տեսակով, որի վրա կարող է լինել ձկնորսական նեյլոնե թել կամ դանակ:

Ձկնորսական թելը կարող է լինել կարճ ու կոշտ կամ երկար, որը ոչ աշխատանքային վիճակում կարող է «թաքնվել» աշխատանքային գլխիկի ներսում. այս դեպքում նեյլոնե թելը դուրս է գալիս տրիմմերի աշխատանքի ընթացքում: Աշխատանքային գլխիկի վրա կարող են լինել նաև պողպատե շեղբեր կոշտ խոտ հնձելու համար, կամ էլ պլաստմասե դանակներ մարգագետնային խոտը հնձելու համար:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում