Ավետիք Չալաբյանի ջերմ շնորհավորանքը կնոջ ծննդյան կապակցությամբ

Անահիտի հետ մեր ապրած կյանքի մասին կարելի է պոեմներ գրել և ֆիլմեր նկարել, թեև նա այդ ամենի մասին համեստորեն լռում է, և շարունակում է ապրել արդեն սովորական դարձած իր բազմազբաղ կյանքով՝ աշխատում է միջազգային խորհրդատվական ընկերությունում, մի շարք բարեգործական ծրագրեր վարում արդեն երկար տարիներ, դաստիարակում մեր չորս երեխաներին, ակտիվ զբաղվում տարբեր սպորտաձևերով և ճանապարհորդում՝ իր փորձը կիսելու և դասավանդելու երիտասարդներին: Եվ այդ ամենով հանդերձ, շարունակում է լինել կանացի, երիտասարդ էներգիայով լի, հմայիչ և բարի!

 

Այս ամառ, երբ ես հայտնվեցի անազատության մեջ, Անահիտը ոչ միայն իր վրա վերցրեց ամբողջ ընտանիքի բեռը, այլև գլխավորեց իմ ազատության համար մղվող ողջ պայքարը, օրնիբուն աշխատելով, մաքառելով, ելույթներ և հանդիպումներ ունենալով՝ տարածելու ճշմարտությունը, պատռելու կեղծիքը, և մոտեցնելու արդարության հաղթանակը: Այս դժվարին պայքարը նոր որակներ բացահայտեց Անահիտի մոտ, դրսևորելով իր աննկուն ոգին, հետևողականությունը և համառությունը, միաժամանակ և վեր հանելով իր անսահման նվիրումը մեր ընտանիքին, մեր հայրենիքին, և մեր բոլորի հավաքական նպատակներին:

 

Այսօր, մեր ընտանիքի համար այս նվիրական օրը, ցանկանում եմ հերթական անգամ իմ անսահման երախտագիտությունը հայտնել սիրելի կնոջս, երեխաներիս հերոսական մայրիկին և կյանքիս անբաժան ընկերոջը: Սիրում եմ քեզ, խոնարհաբար հպարտանում եմ, որ Աստված քեզ պես կին է պարգևել, և խնդրում եմ Աստծուց միշտ երջանկության շողերով ջերմացնել քեզ!