Իջեւան քաղաքում եւ միջպետական մայրուղում մերկասառույց է. Ճանապարհները չեն մշակվում

Մինչ մայրաքաղաք Երեւանում հասարակությունը պահանջում է քաղաքի անգամ փոքր փողոցներն ու մայթերը ձյունից մաքրված տեսնել, մարզերի ճանապարհներին մարդիկ երթեւեկում են՝ վտանգելով սեփական կյանքը: Մ4 միջպետական մայրուղու Իջեւանի հատվածն ամբողջությամբ պատված է մերկասառույցով: Իջեւան քաղաքից դեպի Նոյեմբերյան տանող ճանապարհը մահվան ճանապարհ է դարձել: Ձյունը տրորվել է ավտոմեքենաների անիվների տակ եւ դարձել մերկասառույց:

Դատելով ճանապարհի ներկայիս վիճակից, վերջին երկու- երեք օրերին տեղացած առատ ձյունից հետո մայրուղին ընդհանրապես չի մաքրվել, աղ ու ավազով չի մշակվել: Մերկասառույց է նաեւ Իջեւան քաղաքում: Այստեղ նույնպես` փողոցները չեն մշակվել: Հատուկենտ վարորդներ են ռիսկի դիմում` դուրս գալ երթեւեկության: Ճանապարհները դարձել են մահացու վտանգավոր եւ զգոնության փոքր պակասն անգամ կարող է բերել ավտովթարի: Մ4 մայրուղին սպասարկում է «Իջեւանի ՃՇՇ» ընկերությունը:

Past.am-ի թղթակիցը փորձել է հենց այնտեղ պարզել, թե ինչու չի սպասարկվում ճանապարհը, սակայն ընկերության դուռը կողպված է եղել: Ստացվում է, որ առատ ձյան պատճառով ճանապարհներին արտակարգ իրավիճակ է, սակայն սպասարկող չկա:

Past.am-ի թղթակիցն ահազանգել է Տրանսպորտի եւ կապի նախարարության թեժ գիծ: Թեժ գծի հերթապահը կապ է հաստատել «Իջեւանի ՃՇՇ»-ի հետ, որտեղից էլ հավաստիացրել են, որ ճանապարհները կմաքրեն, սակայն այդ հավաստիացումներից անգամ ժամեր անց` որեւէ տեխնիկա, որեւէ բանվոր մայրուղի դուրս չի եկել:

Գագիկ Աղբալյան