Ադրբեջանի վարչապետը և Թուրքիայի փոխնախագահը խոսել են «Զանգեզուրի միջանցքի» բացման մասին

Փնտրում եք բարձր վարձատրվող աշխատանք՝ սեղմեք ԱՅՍՏԵՂ

Նոյեմբերի 4-ին Բաքվում կայացել է Ադրբեջանի և Թուրքիայի միջև տնտեսական համագործակցության միջկառավարական համատեղ հանձնաժողովի 10-րդ նիստը։ 

Այդ մասին ուրբաթ Trend-ին հայտնել են Ադրբեջանի նախարարների կաբինետում։

Ադրբեջանի վարչապետ Ալի Ասադովի և Թուրքիայի փոխնախագահ Ֆուաթ Օքթայի նախագահությամբ կայացած հանդիպմանը մասնակցել են երկու երկրների համապատասխան պետական ​​կառույցների ղեկավարները։

Ըստ հաղորդագրության՝ հանդիպման ժամանակ նշվել է, որ «Շուշիի հռչակագրի» ստորագրումն էլ ավելի է ամրապնդել ադրբեջանա-թուրքական հարաբերությունները, դրանք բարձրացրել դաշինքի մակարդակի, ամբողջ աշխարհին ցույց տվել երկու երկրների միջև բարեկամության և եղբայրության օրինակելի բնույթը։

«Բացի այդ, ընդգծվել է, որ վերջին տարիներին ադրբեջանա-թուրքական հարաբերությունները նախագահ Իլհամ Ալիևի և նախագահ Ռեջեփ Թայիփ Էրդողանի ջանքերի արդյունքում դուրս են եկել երկկողմ ձևաչափից և ստացել տարածաշրջանային բնույթ։ Բարձր է գնահատվել նաև երկու երկրների միջև հաջող համագործակցությունը տարբեր ոլորտներում, մասնավորապես՝ տնտեսության, առևտրի, ներդրումների, տրանսպորտի և տարանցման, էներգետիկայի, արդյունաբերության, գյուղատնտեսության և այլ ոլորտներում»,- ասված է հաղորդագրության մեջ։

Նշվում է, որ կողմերը «վստահություն են հայտնել, որ «Զանգեզուրի միջանցքի» և դեպի Նախիջևան երկաթուղու բացման արդյունքում ադրբեջանա-թուրքական տնտեսական և առևտրային կապերն էլ ավելի կընդլայնվեն»։