Իրանում տեղի ունեցած ահաբեկչությունը սպասելի էր․ կարող է դեռ էլի ականատես լինենք. Իրանագետ

Փնտրում եք բարձր վարձատրվող աշխատանք՝ սեղմեք ԱՅՍՏԵՂ

Իրանում տեղի ունեցած ահաբեկչությունը սպասելի էր։ Ես նշել էի, որ եթե այդ ցույցները Իրանում շարունակվեն ու վերածվեն զինյալ պայքարի, ինչը հիմա փորձում են իրականացնել քրդերը, բելուջները՝ օգտագործելով պատեհ առիթը, նման դեպքերը բացառված չեն։ Դրսից հովանավորելով՝ փորձ է արվում Իրանում խժդժություններ առաջացնել։ Այս ամենից հետո բնական է, որ երկրում նմանատիպ իրադարձությունների ականատես եղանք եւ կարող է դեռ ականատես լինենք»,- «Փաստինֆո»-ի հետ զրույցում այս մասին ասաց իրանագետ Հարութ Արթին Առաքելյանը՝ անդրադառնալում Իրանում տեղի ունեցած ահաբեկչությանը։

Մասնագետի խոսքով, դա դրսից հովանավորվող պայքարն է Իրանի դեմ։

«Այս դեպքի հետ կապված Իրանը Սաուդյան Արաբիայի մասին է խոսում, բայց չենք կարող ասել, որովհետեւ Իսրայել կա, ԱՄՆ կա։ Միջուկային գիտնականների ահաբեկչության ականատեսն ենք եղել Իրանում, հիմա, օգտվելով երկրում խժդժություններից, օգտվելով նրանից, որ երկրի հարավ-արեւելյան սահմանի քրդական շրջաններում զինյալ պայքար է հասունանում՝ ականատես ենք, որ իրենց տերերը խրախուսում են ահաբեկչական խմբավորումներին»,-ասաց Իրանագետը՝ հավելելով, որ Իրանի ղեկավարությունը կկոշտացնի դիրքորոշումը երկրում տեղի ունեցող զանգվածային ցույցերը ճնշելու համար։

Հիշեցնենք, որ ահաբեկչություն է տեղի ունեցել Իրանի Շիրազ քաղաքի Շահչերաղ սրբավայրում, որտեղ այդ պահին ուխտավորներ են եղել. 3 անձ ներխուժել են ու սկսել կրակել։ Զոհվել է առնվազն 15 մարդ, այդ թվում՝ երեխաներ, շուրջ 40-ը՝ վիրավորվել։ Իրանի նախագահ Էբրահիմ Ռայիսին հայտարարել է, որ Իրանի անվտանգության ուժերը «ջախջախիչ պատասխան» կտան հարձակման կազմակերպիչներին և կատարողներին։

Իրանագետի խոսքով, Իրանը թե ծավալով, թե տնտեսությամբ, թե բնակչությամբ, եւ թե, իհարկե, ռազմական ներկայությամբ , տարածաշրջանում կարեւոր երկիր է եւ նման իրավիճակին մատնվելը կամ թուլանալը խնդիրներ է առաջացնելու հարեւանների համար՝ տնտեսականից մինչեւ անվտանգային։

Առաքելյանը հիշեց, որ, որ կորպուսի հրամանատար Սոլեյմանիի ահաբեկչությունից հետո Իրանը Ամերիկայի բազային 11 հրթիռ արձակեց՝ որպես պատժ։ Այս դեպքում էլ, Իրանը հնարավոր է՝ գործողությունների դիմի։ «Պետք է սպասել, թե իրենք ինչպես են գնահատում՝ ով է գլխավոր մեղավորը։ Իրանական մամուլը այսօր գլխավոր թիրախ էր դարձրել Սաուդյան Արաբիային, ինչը բնական է»,-նշեց մասնագետը։ Անդրադառնալով Արեւմուտք-Իրան հարաբերություններին, նա ընդգծեց, որ ԱՄՆ-ն հայտարարել է, որ եթե միջուկային բանակցությունները փակուղի մտնեն , սեղանին այլ գործողություններ կան։

«Մենք տեսնում ենք, որ Իրանը չստորագրեց համաձայնագիրը , այն թողեցին մինչեւ ԱՄՆ-ի ընտրությունների անցկացումը։ Եթե անգամ համաձայնագիը կնքվեր, ԱՄՆ-ը Իրանի վրա նոր սանկցիաներ կդներ՝ ինչ-որ բան գտնելով , օրինակ՝ մարդու իրավունքների բնագավառում», -համոզված է իրանագետը։ Ինչ վերաբերում է Թուրքիային, մասնագետի խոսքով, նա կարող է իրավիճակից օգտվել, եթե Իրանի հետ կապված վակում առաջանա տարածաշրջանում։

«Եթե մեր երաշխավորները նման խնդիրներ ունենան, ապա տարածաշրջանում այսպես կոչված խաղաղության դարաշրջանը կավարտվի»։

Կլինե՞ն արդյոք նոր թեժ կետեր տարածաշրջանում, իրանագետն ասում է՝ այս պահին ոչ, բայց եթե բալանսը խարխլվի, դա չի բացառվում։