«Ուղղակի խաչ են քաշել գյուղատնտեսության վրա. դոփում ենք տեղում և ավելի ենք անդունդը գլորվում». «Փաստ»

«Փաստ» օրաթերթը գրում է

Գյուղատնտեսության ոլորտը մշտապես «Փաստի» ուշադրության կենտրոնում է: Փորձագետների հետ պարբերական զրույցների ընթացքում փորձում ենք պարզել՝ փոփոխություններ եղե՞լ են ոլորտում, տրվե՞լ են ընթացիկ խնդիրների լուծումները և այլն: «Ագրարագյուղացիական միավորում» ՀԿ-ի նախագահ Հրաչ Բերբերյանը մեզ հետ զրույցում այս անգամ առաջին հերթին առանձնացնում է սերմերի խնդիրը, նշում է՝ այս պահին ունենք սերմերի, հատկապես դրանց որակի խնդիր:

«Վերջերս չակերտավոր մի մասնագետ փորձում էր համոզել մեզ, որ Հայաստանն աշնանացանի առումով սերմնաբավ է: Իհարկե, դա այդպես չէ:Բացի դա, տգիտության աստիճանն այնքան է, որ այդ մարդիկ տեղյակ չեն, որ գյուղատնտեսության մեջ սերմնաթարմացման խնդիր կա, և անընդհատ սերմաթարմացում պետք է անենք: Պետք է պարբերաբար ներկրենք սուպեր էլիտա, էլիտա և այլ տեսակի սերմեր: Սերմերի վիճակն անմխիթար է: Նորություն չենք ասի, որ պարարտանյութերի գները շարունակում են թանկ մնալ, գյուղացին որևէ հույս չունի, թե գնանկում կլինի, էժան գնով կկարողանա պարարտանյութ կամ դիզելային վառելիք գնել: Ի դեպ, բարձրացել են նաև վարի գները, քանի որ դիզվառելիքի գները բարձրացան և չնվազեցին, ինչպես միշտ: Կարծում եմ՝ այս ամենի ֆոնին կունենանք ցանքատարածությունների անկում»,-«Փաստի» հետ զրույցում ասում է Բերբերյանը:

Մեզ հետ զրույցներում փորձագետը պարբերաբար բարձրացրել է պարարտանյութերի որակի ու գնի, դիզվառելիքի թանկացման, սերմացուի որակի հարցերը: Հետաքրքրվում ենք՝ իսկ քննարկումներ կամ քննարկումներ անցկացնելու առաջարկներ եղե՞լ են համապատասխան գերատեսչությունների կողմից: «Եթե նույնիսկ քննարկումներ եղել են, ապա մեզ այդ քննարկումներին չեն հրավիրել: Քպականները սարսափելի «լուրջ» մասնագետներ են, և իրենց միջոցով, իրենց ուղեղների չափով են փորձում այդ հարցերը լուծել: Պարզ ասացի, չէ՞»,-նշում է մեր զրուցակիցը:

Հաջորդիվ անդրադառնում ենք մթերման խնդրին: «Այս առումով ևս փոփոխություններ չունենք: Խաղողի վիճակը ծանր է, գյուղացիները մասսայաբար դժգոհում են: Պատահական չէ, որ խաղողագործները էկոնոմիկայի նախարարին մեդալ նվիրեցին»,-հավելում է փորձագետը՝ վերհիշելով վերջերս տեղի ունեցած քննարկումը, որի ժամանակ խաղողագործները «խաբեբաների մեդալ» տվեցին էկոնոմիկայի նախարար Վահան Քերոբյանին: Ի դեպ, Բերբերյանը տարակուսած է, ասում է, որ վերջերս շատ լրատվամիջոցներ մի տեսակ սկսել են անտեսել գյուղատնտեսությանն առնչվող թեմաները: «Նման միտում ենք սկսել նկատել: Պատճառը չգիտենք, թե որն է: Բայց կարծում եմ՝ կան ճնշումներ: Ամենաթույլ տեղերից մեկն է, ակնհայտորեն տեսնում ենք, թե ինչպիսի ծանր վիճակում է հայտնվել հայ գյուղացին»,-ընդգծում է նա:

Փորձագետի խոսքով, մարդիկ կան, որոնք ուղղակի չեն ուզում, որ գյուղատնտեսության ոլորտում առկա հարցերը լուծում ստանան, ուղղակի խաչ են քաշել ոլորտի վրա: Նշում է՝ ռազմական վերջին ագրեսիայի ընթացքում Գեղարքունիքի մարզում արոտավայրեր ենք կորցրել, սակայն հույս ունի, որ միջազգային կառույցների, եվրոպական երկրների օգնությամբ դրանք հետ կբերենք: «Այս օրերին այնտեղ բերքահավաք է ընթանում, օրերս եղել եմ Սոթքի տարածաշրջանում: Գյուղացիներն ավելի մեծ ակնկալիքներ ունեին, բայց, դե, լավ չեն մշակել, գիտենք՝ ինչ պայմաններ էին: Ինչ-որ շահույթ կունենան, բայց ռեկորդային բերք այնտեղ չենք տեսնում: Բացի դա, վերջին շրջանում նաև խոտածածկերի հրդեհներ են լինում, անասնակերի հետ կապված խնդիրներ ենք ունենալու»,-նշում է ՀԿ-ի նախագահը:

Հիշեցնում է՝ արդեն երրորդ տարին է, ինչ բարձրաձայնում է, որ անասնագլխաքանակը նվազում է, սակայն որևէ քայլ չի արվում իրավիճակը շտկելու համար:

ԼՈՒՍԻՆԵ ԱՌԱՔԵԼՅԱՆ

Մանրամասները՝ «Փաստ» օրաթերթի այսօրվա համարում