Երեւանում երթեւեկությունը կաթվածահար է եղել. փողոցներն ու բակերը ձյան շերտի տակ են (լուսանկարներ)

News.am-ը գրում է .

Երեւանում մի քանի օր տեղացած ձյան պատճառով կաթվածահար է եղել ողջ երթեւեկությունը։ Փողոցները ձյան հաստ շերտի տակ են, եւ մեքենաները շատ մեծ դժվարությամբ են շարժվում։

Ձյունից չեն մաքրվել անգամ Երեւանի կենտրոնական փողոցները, էլ չենք խոսում մայթերի ու բակերի մասին։
NEWS.am-ը տասնյակ ահազանգեր է ստանում քաղաքի տարբեր թաղամասերում ապրող քաղաքացիներից, որոնք նշում են, որ քաղաքը կոլապսի մեջ է մատնվել, մարդիկ չեն կարողանում տնից դուրս գալ։

«Քաղաքում փողոցները մաքրված չեն։ Մեքենաները շատ են, որոնք փողոցների ձյունը դարձրել են պինդ սպիտակ հարթություն»,- նշեց քաղաքացիներից մեկը։

Նրանք զայրացած նշում են, որ այս ողջ անգործության ֆոնին, քաղաքապետարանը հաղորդագրություն է տարածում, որտեղ նշում է, որ սանմաքրման ձեռնարկություններն աշխատում են արտակարգ ռեժիմով եւ ձնամաքրման աշխատանքները չեն դադարել անգամ գիշերը։

Ավելի վաղ NEWS.am-ը հայտնել էր, որ ըստ քաղաքապետարանի հաղորդագրության, անդադար տեղացող աննախադեպ ձյան պայմաններում մայրաքաղաքում ամբողջ գիշեր ընթացել եւ վաղ առավոտից շարունակվում են ձնամաքրման աշխատանքները: «Արտակարգ ռեժիմով աշխատող սանմաքրման ձեռնարկությունները շարունակում են համապատասխան հատուկ տեխնիկայի միջոցով մաքրել մայրաքաղաքի գլխավոր եւ երկրորդական փողոցները: Փողոցների մաքրման աշխատանքներին զուգահեռ,  շարունակվում են նաեւ  մայթերի, կանգառասրահների, բակերի եւ միջբակային տարածքների ու աստիճանահարթակների ձնամաքրման, նաեւ աղի եւ ավազի խառնուրդով մշակման աշխատանքները: Աշխատանքները վերահսկվում եւ կանոնակարգվում են Երեւանի քաղաքապետարանի կոմունալ տնտեսության վարչության եւ հատուկ օպերատիվ շտաբի կողմից»,-ասված է քաղաքապետարանի տարածած հաղորդագրության մեջ։