Ռուսաստանի սահմանների մոտ հասունանում է նոր Ուկրաինա․ «Փաստ»

«Փաստ» օրաթերթը գրում է

tsargrad.tv-ն «Ռուսաստանի սահմանների մոտ հասունանում է նոր Ուկրաինա. խաղի մեջ է մտել ԱՄՆ-ը» վերնագրով հոդվածում գրում է, որ ՌԴ ԳԱ Արևելագիտության ինստիտուտի փոխտնօրեն Ալեքսանդր Սկակովը tsargrad.tv-ի թղթակցի հետ զրույցում մեկնաբանել է վերջին օրերին Հայաստանում ՀԱՊԿ-ի ներկայության դեմ ծավալվող ցույցերը։ Փորձագետը վստահություն է հայտնել, որ Ղարաբաղյան հակամարտության նոր սրման ժամանակը պատահական չի ընտրվել։ Բաքուն, հասկանալով, որ Մոսկվան այժմ զբաղված է Ուկրաինայում հատուկ գործողությամբ, որոշել է հասնել հնարավոր առավելագույնին Երևանի հետ գրեթե մեն-մենակ պայմաններում։

Իսկ Ռուսաստանը պասիվ կեցվածք է ընդունել, քան կարելի էր սպասել, և խաղի մեջ են մտել ամերիկացիները, մասնավորապես ԱՄՆ-ի Ներկայացուցիչների պալատի խոսնակ Նենսի Փելոսին։ «Ինչո՞ւ Վաշինգտոնը: Որովհետև ՆԱՏՕ-ն չի կարող օգնել Հայաստանին՝ Թուրքիան այդ դաշինքի անդամ է, իսկ նա էլ Ադրբեջանի դաշնակիցն է։ ՆԱՏՕում որոշումներն ընդունվում են կոնսենսուսով։ Հետևաբար, Երևանը որևէ կերպ չի կարող հույս դնել այդ դաշինքի աջակցության վրա։ Եվ ամերիկացիները ակնարկում են հայկական վերնախավին ու հասարակությանը, որ, ՀԱՊԿ-ն ու դաշնակից Ռուսաստանը ձեզ ոչ մի կերպ չեն կարող օգնել, իսկ ԱՄՆ-ը ի վիճակի է,- բացատրել է զրուցակիցը,- բայց, իհարկե, դա պատրանք է։

ԱՄՆ-ն իրական աջակցություն չի ցուցաբերի, նրանք դա հիմա չեն կարող անել»։ Այնուամենայնիվ, այդ ամենը ազդում է Հայաստանի հասարակության որոշ շերտերի վրա։ «Փողոցային փոքրիկ ներկայացումների, ցույցերի մեջ առանձնահատուկ բան չկա, երկրում միշտ էլ եղել է հասարակության որոշակի հատված, որն ավելի արևմտամետ է, նույնիսկ մի քիչ ռուսաֆոբ: Բայց դա հասարակության մի փոքր մասն է և ոչինչ չի լուծում։ Այնուամենայնիվ, այդ շերտը օգտագործել է իրավիճակը իրեն դրսևորելու և վերահաստատելու համար: Սակայն տեսանելի ապագայում դա չի հանգեցնի Հայաստանի քաղաքականության որևէ լուրջ փոփոխության»,- ամփոփել է Սկակովը։

Մանրամասները՝ «Փաստ» օրաթերթի այսօրվա համարում