Չարլզ III-ը Մեծ Բրիտանիայի թագավոր կհռչակվի սեպտեմբերի 10-ին

Շուտով ջեռուցման սեզոնն է, իսկ էլ. էներգիայի համար վճարում եք չափազանց շատ։ Իսկ դուք գիտե՞ք, որ այսուհետ էլ. էներգիան յուրաքանչյուր ընտանիքում կարող է լինել անվճար։ Սեղմեք և ծանոթացեք պայմաններին` ԱՅՍՏԵՂ

Շաբաթ՝ սեպտեմբերի 10-ին, Չարլզ III-ը պաշտոնապես կհռչակվի Մեծ Բրիտանիայի նոր թագավոր, գրում է The Times թերթը։ Ավելի վաղ հաղորդվում էր, որ նոր թագավորի պաշտոնական հռչակումը տեղի կունենա սեպտեմբերի 9-ին։

Ինչպես նշված է հոդվածում, սեպտեմբերի 9-ին նոր թագավորն ու կոնսորտ-թագուհի Քամիլան կվերադառնան շոտլանդական Բալմորալ ամրոցից, որտեղ նախորդ օրը մահացել է Եղիսաբեթ II-ը։ Չնայած այն բանին, որ պաշտոնապես նա դեռ չի հռչակվել Մեծ Բրիտանիայի թագավոր, իսկ թագադրումը տեղի կունենա միայն ամիսներ անց, միևնույն է Չարլզ Ֆիլիպ Արթուր Ջորջը դարձել է Մեծ Բրիտանիայի թագավոր մոր մահից անմիջապես հետո։

Սպասվում է, որ օրվա երկրորդ կեսին թագավորը կարող է առաջին հանդիպումն ունենալ վարչապետ Լիզ Թրասի հետ։ Չարլզ III-ը հանդիպում կունենա նաև կոմս-մարշալ, Մեծ Բրիտանիայի հերալդիկ պալատի նախագահ և գլխավոր արարողապետ Էդուարդ Ֆիցալան-Հովարդի՝ Նորֆոլկի 18-րդ դքսի հետ։ Վերջինս այս պաշտոնը ժառանգաբար ստանձնել է 2002 թվականին և պատասխանատու է կայանալիք թագավորական հուղարկավորության կազմակերպման համար։ Եղիսաբեթ II-ի հուղարկավորության օրը դեռ հայտնի չէ, սակայն հնարավոր է, որ այն որոշվի հենց այդ հանդիպման ժամանակ։

Հաղորդվում է նաև, որ սեպտեմբերի 9-ին տեղական ժամանակով ժամը 18։00-ի սահմաններում (երևանյան ժամանակով ժամը 21:00-ին) կհեռարձակվի Չարլզ III-ի հեռուստատեսային ուղերձը, որը նոր կարգավիճակում առաջինն է լինելու։

Հիշեցնենք, որ երեկ՝ սեպտեմբերի 8-ին, 96 տարեկանում կյանքից հեռացել է Մեծ Բրիտանիայի թագուհի Եղիսաբեթ II-ը։ Թագուհու մահվան պատճառները չեն հաղորդվում:

Եղիսաբեթ II-ը՝ Գեորգ VI թագավորի և լեդի Էլիզաբեթ Բոուս-Լիոնի ավագ դուստրն է, ծնվել է 1926 թվականի ապրիլի 21-ին Լոնդոնում։ 1936 թվականին, հոր գահ բարձրանալուց հետո, Եղիսաբեթը դարձավ բրիտանական թագի ժառանգորդը։ Նա կրթություն է ստացել տանը, իսկ 1945 թվականին ընդունվել է բրիտանական բանակի իգական դիվիզիա, Երկրորդ համաշխարհային պատերազմի վերջում ստացել է կրտսեր հրամանատարի կոչում։

1947 թվականին տեղի է ունեցել Եղիսաբեթի և Հունաստանի և Դանիայի արքայազն Ֆիլիպի հարսանիքը, որը հրաժարվեց բոլոր տիտղոսներից, ընդունեց բրիտանական քաղաքացիությունը և ստացավ Էդինբուրգի դուքսի կոչում։ Նրանք ունեցան չորս երեխա՝ Չարլզը՝ Ուելսի արքայազնը, արքայադուստր Աննան, արքայազն Էնդրյուն՝ Յորքի դուքսը և արքայազն Էդվարդը՝ Ուեսեքսի կոմսը:

1952 թվականին, հոր մահից հետո, Եղիսաբեթ II-ը դարձավ Մեծ Բրիտանիայի և Հյուսիսային Իռլանդիայի Միացյալ Թագավորության թագուհի, Համագործակցության 15 թագավորությունների կառավարիչ և բուն Համագործակցության ղեկավար, Անգլիկան եկեղեցու ղեկավար և զինված ուժերի Գերագույն գլխավոր հրամանատար։